Qazaqstan men Ózbekstan memlekettik shekarany demarkatsııalaý shartyn daıyndady – QR SІM

ASTANA. QazAqparat – 14-19 qarasha aralyǵynda Tashkentte birlesken Qazaqstan-Ózbekstan demarkatsııalyq komıssııasynyń 100-shi otyrysy ótti. BAQ ókilderiniń qatysýymen ótken brıfıngte Syrtqy ister mınıstrliginiń resmı ókili Aıbek Smadııarov osylaı málimdedi, dep habarlaıdy QazAqparat tilshisi.

«14-19 qarasha aralyǵynda Tashkent qalasynda birlesken Qazaqstan-Ózbekstan demarkatsııalyq komıssııasyndaǵy Qazaqstan Respýblıkasy men Ózbekstan Respýblıkasy úkimettik delegatsııalarynyń 100-shi otyrysy ótti.

Taraptar Qazaqstan-Ózbekstan memlekettik shekarasyn shegendeý týraly sharttyń jobasyn jáne atalǵan shartqa qosymsha bolyp tabylatyn shekarany demarkatsııalaýdyń qorytyndy qujattarynyń jobalaryn qol qoıýǵa daıyndady. Sonymen qatar, taraptar birlesken Qazaqstan-Ózbekstan demarkatsııalyq komıssııasynyń jumysy týraly qorytyndy hattamaǵa qol qoıdy. Kelissózder dostyq pen ózara túsinistik sıpatynda ótti», - dep atap ótti vedomstvonyń resmı ókili.

Munymen qosa, brıfıng barysynda Aıbek Smadııarov Prezıdent saılaýynda shet elderde daýys berý protsesiniń qalaı ótkeni týraly baıandady. Onyń aıtýynsha, 3 shet memlekette qazaqstandyqtar kóp daýys bergen.

Foto: QR Syrtqy ister mınıstrliginiń baspasóz qyzmeti