Qazaqstan men Ózbekstan memlekettik shekara máselesinde yntymaqtastyqty damytady - Parlament
ASTANA. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń Úkimeti men Ózbekstan Respýblıkasy Úkimetiniń arasyndaǵy shekara ókilderiniń qyzmeti týraly kelisimdi ratıfıkatsııalaý týraly» QR Zańyn qabyldady.
Qazaqstan men Ózbekstan arasyndaǵy kelisimge 2000 jyly Tashkentte qol qoıylǵan. Qujat eki el arasyndaǵy shekaralyq máseleler boıynsha sharttyq-quqyqtyq bazany jetildirýge baǵyttalady. Atap aıtqanda, kelisim shekara ókilderiniń qyzmeti, shekaralyq máselelerdi retteý, shekaradaǵy turaqtylyqty odan ári qamtamasyz etý jáne shekaralyq yntymaqtastyqty yntalandyrý, sonymen birge, memlekettik shekara rejımin saqtaý úshin negiz qalanady.
Qujatqa sáıkes, taraptar shekara ókilderi men shekara ókilderiniń orynbasarlaryn taǵaıyndaıdy jáne olardyń tegin, atyn jáne ákesiniń atyn, qyzmet etý ýchaskeleri men bolatyn oryndaryn kórsete otyryp, dıplomatııalyq arnalar arqyly bir-birine bul týraly habarlaýy tıis. «Shekara ókilderi ózderi qyzmet etetin ýchaskeler sheginde oqys oqıǵalardyń aldyn alý jáne olardy retteý jóninde qajetti sharalardy qabyldaıdy. Memlekettik shekarany kesip ótýdiń belgilengen qaǵıdalarynyń saqtalýyn baqylaıdy. Sondaı-aq, tıisti memlekettik organdarmen birlesip qarý-jaraqtyń, oq-dárilerdiń, esirtki, psıhotroptyq zattardyń, valıýtanyń jáne radıoaktıvti zattardyń kontrabandasyna qarsy kúres jóninde qajetti sharalardy qolǵa alady», - dedi QR Ulttyq qaýipsizdik komıteti tóraǵasynyń orynbasary-Shekara qyzmetiniń dırektory Nurlan Jolamanov.
Budan bólek, órtterdiń, epıdemııalardyń, epızotııalardyń jáne aýyl sharýashylyǵy zııankesteriniń taralý qaýpi týraly bir-birin ýaqtyly habardar etedi. Jalpy, qujatty qabyldaý memlekettik shekara rejimin ustap turýǵa, tatý kórshilik qatynasty odan ári nyǵaıtýǵa, Qazaqstan men Ózbekstan arasyndaǵy memlekettik shekara máselesinde ózara yntymaqtastyqty damytýǵa múmkindik bermek. Parlament qabyldaǵan qujat Memleket basshysynyń qol qoıýyna joldanady.
