Qazaqstan men Ózbekstan mádenı-gýmanıtarlyq yntymaqtastyq josparyna qol qoıdy
ASTANA. KAZINFORM - Tashkent qalasynda Ortalyq Azııa elderi men AQSh mádenıet mınıstrleriniń C5+1 formatyndaǵy kezdesýi aıasynda Qazaqstan Respýblıkasy Premer-mınıstriniń orynbasary – Mádenıet jáne aqparat mınıstri Aıda Balaeva Ózbekstan Respýblıkasynyń Mádenıet mınıstri Ozodbek Nazarbekovpen kezdesti.
QR Mádenıet jáne aqparat mınıstrligi baspasóz qyzmetiniń habarlaýynsha, taraptar eki el arasyndaǵy mádenı-gýmanıtarlyq baılanystardy odan ári damytý máselelerin talqylady. Ásirese ádebıet salasyndaǵy yntymaqtastyqqa jáne teatr óneri baǵytyndaǵy ózara is-qımyldy keńeıtýge basa nazar aýdaryldy.
Kezdesý sońynda taraptar 2024-2025 jyldarǵa arnalǵan is-sharalar josparynyń tolyq júzege asyrylǵanyn atap ótip, Qazaqstan Respýblıkasy Mádenıet jáne aqparat mınıstrligi men Ózbekstan Respýblıkasy Mádenıet mınıstrligi arasyndaǵy 2026-2027 jyldarǵa arnalǵan mádenı-gýmanıtarlyq yntymaqtastyq jónindegi jańa is-sharalar josparyna qol qoıdy.
Atalǵan qujat eki el arasyndaǵy mádenı baılanysty nyǵaıtýǵa baǵyttalǵan birlesken is-sharalardy ótkizý men ortaq jobalardy iske asyrýdy kózdeıdi.
Osyǵan deıin Beıjińde Qazaqstan men Qytaıdyń ózara mádenıet jylynyń ashylý saltanaty ótkeni týraly jazdyq.
