Qazaqstan men Ózbekstan mádenı baılanystardy nyǵaıtýǵa múddeli

TAShKENT. KAZINFORM — Ózbekstan prezıdentiniń kómekshisi Saıda Mırzıeeva osy eldegi Qazaqstannyń elshisi Beıbit Atamqulovty qabyldady, dep habarlaıdy Kazinform agenttiginiń menshikti tilshisi.

Kezdesý barysynda taraptar qos el arasyndaǵy mádenı-gýmanıtarlyq baılanystardy nyǵaıtý jáne odaqtastyq qarym-qatynasty odan ári tereńdetý múmkindikterin talqylady.

Atap aıtqanda, Astana men Almaty qalalarynda Á.Naýaı atyndaǵy memlekettik akademııalyq teatrynyń gastrolin uıymdastyrý josparlanyp otyr. Sonymen qatar, Saıda Mırzıeeva men Beıbit Atamqulov elimizdiń Ulttyq mýzeıinde jáne Á.Qasteev atyndaǵy Qazaqstan óner murajaıynda ózbek tarapynyń kórmelerin ótkizý usynysyn qarastyrdy.

— Ýaǵdalasqan is-sharalardy joǵary deńgeıde uıymdastyrýǵa jan-jaqty qoldaý kórsetýge daıynbyz. Ózbekstan men Qazaqstan basshylarynyń nátıjeli jumysy arqasynda qalyptasqan baýyrlas halyqtar arasyndaǵy dostyqty odan ári nyǵaıtýǵa nıettimiz, — dep pikir bildirdi Saıda Mırzıeeva.

Eske salaıyq, Qazaqstan men Ózbekstan arasynda qosymsha 4 saýda dálizi ashylýy múmkin.

Buǵan deıin habarlaǵanymyzdaı, Tashkentte Qazaqstannyń, Astanada Ózbekstannyń saýda ortalyǵyn salý josparlanyp otyr.

Toqtala keteıik, búginde Ózbekstanda qazaqstandyq kapıtalmen myńnan astam kásiporyn jumys isteıdi. Bul rette eki el arasyndaǵy óńiraralyq baılanys nyǵaıyp keledi.