Qazaqstan men Ózbekstan qylmyspen kúreste ózara is-qımyldy nyǵaıtady
NUR-SULTAN. QazAqparat - Qazaqstannyń ishki ister mınıstri Erlan Turǵymbaev Ózbekstannyń Іshki ister mınıstriniń orynbasary Najmıddın Turahodjaevpen kezdesti, dep habarlaıdy QazAqparat.
Taraptar ekijaqty yntymaqtastyqty talqylap, qylmysqa, zańsyz kóshi-qonǵa, quqyq buzýshylyqtyń aldyn alýǵa, sondaı-aq tsıfrlandyrý men qazirgi zamanǵy qaýipsizdik júıelerin engizýge qatysty keń aýqymdy máseleler boıynsha pikir almasty.
Kezdesýge qatysýshylar ishki ister organdarynyń shekaramańy bólimsheleriniń ózara is-qımylyn odan ári nyǵaıtýǵa nıet bildirdi.
Aıta ketý kerek, kóptegen jyldar boıy eki eldiń polıtseıleri bir-birine qylmystyq ister boıynsha praktıkalyq kómek kórsetip keledi, birlesken izdestirý jumystary jolǵa qoıylǵan.
Erlan Turǵymbaev Qazaqstan ІІM reformalaý úderisinde ekenin atap ótti. Іshki ister organdaryn jańǵyrtý jónindegi jol kartasy iske asyrylýda.
«Ózbekstanda da, Qazaqstanda da qylmysqa qarsy kúreste aqparattyq-kommýnıkatsııalyq júıeler men ozyq tsıfrlyq tehnologııalardy paıdalanýǵa kóp kóńil bólinedi. Bizdiń elderimiz arasynda ortaq nárse kóp bolǵandyqtan, biz qazaqstandyq polıtsııany reformalaý tájirıbesine qyzyǵýshylyq tanytamyz», - dedi mınıstrdiń orynbasary Najmıddın Turahodjaev.
«Bizdiń prezıdentterimizdiń kúsh-jigeriniń arqasynda eki el arasyndaǵy yntymaqtastyq senim men ózara kómekke negizdelgen. Áriptestiktiń belgili bir praktıkasy polıtsııa vedomstvolary – azamattardyń qaýipsizdigin qamtamasyz etýge jaýapty organdar arasynda da qalyptasqan. Men búgin bizdiń ózara is-qımyl aıasyn keńeıtýge múmkindigimiz bar ekenine qýanyshtymyn. Polıtsııa qyzmetin tsıfrlandyrý oqıǵalarǵa jáne azamattardyń ótinishterine jedel den qoıýǵa múmkindik berdi. Sondyqtan Qazaqstannyń ІІM osy saladaǵy ózara tájirıbe almasýdy quptaıdy», - dep atap ótti kezdesý barysynda mınıstr Erlan Turǵymbaev.
Kezdesý qorytyndysy boıynsha eki eldiń vedomstvolary yntymaqtastyqtyń keleshegin anyqtady.
