Qazaqstan men Ózbekstan kún energııasy úlesin arttyrý máselesin talqylady
TAShKENT. QazAqparat -Qazaqstandyq taraptyń bastamasymen Ózbekstandaǵy Qazaqstan elshisi Erik Útembaev pen Ózbekstan Respýblıkasy ǵylym akademııasynyń «Fızıka-Solntse» ǴÓB fızıka-tehnıkalyq ınstıtýtynyń dırektory Nılýfar Avezova kezdesti, dep habarlaıdy «QazAqparat» HAA menshikti tilshisi.
Kezdesý barysynda Nılýfar Avezova Samarqan oblysyndaǵy 100 MVt qýatty kún elektr stantsııasynyń qurylysy boıynsha júrgizilgen jumystar jáne enırgııamen qamtamasyz etýdegi kún energııasy úlesin arttyrýǵa baǵyttalǵan ınstıtýt jobalary týraly aıtty.
Sonymen qatar, 2018 jyly iske qosylatyn ǵylymı polıgondaǵy 50 Ga jer aýdanyn qamtıtyn kún energııasyn óńdeý jáne generatsııalaý jobasynyń perspektıkalary da sóz etildi.
Buǵan qosa, ınstıtýt dırektory Japonııa, Qytaı Halyq Respýblıkasy, Ońtústik Koreıa jáne basqa da fotoelektr panelderin óndirýshi eldermen birlese jınaǵan tájirıbesimen de bólisti.
Óz kezeginde qazaqstandyq dıplomat Qazaqstan jáne Ózbekstannyń ǵylymı-zertteý ınstıtýttary arasyndaǵy ózara árekettestikti, ásirese «EKSPO-2017» kórme kesheni bazasynda qurylǵan halyqaralyq jasyl tehnologııalar ortalyǵy turǵysynan jandandyrý múmkindikterin atap ótti.
Sonymen qatar, Qazaqstandaǵydaı Ózbekstanda da jaz maýsymynyń ystyqtyǵy men uzaqtyǵy kún energııasyn generatsııalaý salasynda tájirıbe almasý úshin turaqty baılanysty retteýge múmkindik beretindigine baza nazar aýdaryldy.
Ózbek ınstıtýtynyń dırektory Qazaqstan tarapymen jańa seriktestik ornatýdyń qajettiligi jaıly oılarymen bólise kele, alǵashqy qadam retinde ózara árekettestiktiń naqty nysanyn anyqtaý úshin birlesken semınarlar ótkizýdi usyndy.
Kezdesý sońynda qazaqstandyq dıplomat Nılýfar Avezovany qazaqstandyq áriptesterimen jumys kezdesýlerin ótkizý maqsatynda Astana qalasyna shaqyrdy.
