Qazaqstan men Ózbekstan kóliktik baqylaýdy tsıfrlandyrý máselesin qarady
ASTANA. KAZINFORM — Qazaqstan Respýblıkasy men Ózbekstan Respýblıkasy ókilderiniń kóliktik baqylaý salasyndaǵy yntymaqtastyq máseleleri boıynsha onlaın formatta jumys kezdesýi ótti.
Qazaqstandyq delegatsııany Kólik mınıstrligi Kóliktik baqylaý komıtetiniń tóraǵasy Dastan Jumaqulov, al ózbekstandyq delegatsııany Ózbekstan Respýblıkasynyń Kóliktik baqylaý ınspektsııasynyń basshysy Djamshıd Karımov basqardy.
Kezdesý barysynda taraptar eki eldegi kóliktik baqylaýdy uıymdastyrý jáne júzege asyrý tájirıbesimen almasyp, avtomobıl tasymaldaryn baqylaýdyń qoldanystaǵy tetikterin, sondaı-aq baqylaý rásimderin jetildirý máselelerin talqylady.
Kóliktik baqylaýdy tsıfrlandyrý máselelerine erekshe nazar aýdaryldy. Taraptar tsıfrlyq sheshimderdi engizý baqylaý protsesteriniń ashyqtyǵyn arttyrýǵa, adamı faktordyń yqpalyn azaıtýǵa jáne ýákiletti organdar jumysynyń tıimdiligin arttyrýǵa múmkindik beretinin atap ótti.
Kezdesý qorytyndysy boıynsha kóliktik baqylaý salasynda tájirıbe almasýdy jalǵastyrý, onyń ishinde ózbekstandyq áriptesterdi Qazaqstanda qoldanylatyn tsıfrlyq sheshimdermen jáne olardy paıdalaný tájirıbesimen tanystyrýdy uıymdastyrý týraly ýaǵdalastyqqa qol jetkizildi.
Taraptar kóliktik baqylaýdy jetildirý máseleleri boıynsha ózara is-qımyldy jalǵastyrýǵa daıyn ekendikterin bildirdi.
Aıta ketelik Qazaqstan men Ózbekstan qaýipsizdik salasyndaǵy yntymaqtastyqty kúsheıtetini týraly jazǵan edik.
