Qazaqstan men Ózbekstan kıikterdi qaıta jersindirý máselesin talqylady
ASTANA. KAZINFORM- Qazaqstan men Ózbekstan kıikterdi Ózbekstan aýmaǵyna qaıta jersindirý máseleleri boıynsha yntymaqtastyqty jalǵastyrýǵa kelisti. Taraptar sondaı-aq shekaralas óńirlerdegi ekologııalyq jaǵdaıdy jaqsartý, atmosferalyq aýanyń sapasyn arttyrý jáne Ortalyq Azııa elderiniń tabıǵatty qorǵaý salasyndaǵy ózara is-qımylyn nyǵaıtý máselelerin talqylady.
QR Ekologııa jáne tabıǵıs resýrstar mınıstrligi baspasóz qyzmetiniń habarlaýynsha, bul máseleler Bıologııalyq ártúrlilik jónindegi BUU konferentsııasy (KS-17) aıasynda Qazaqstannyń Ekologııa jáne tabıǵı resýrstar mınıstri Álibek Qýantyrov pen Ózbekstan Respýblıkasy Prezıdentiniń ekologııa máseleleri jónindegi keńesshisi, Ekologııa jáne klımattyń ózgerýi jónindegi ulttyq komıtettiń tóraǵasy Azız Abdýhakımovtyń kezdesýinde qaraldy.
Ózbekstan tarapy Qazaqstannyń kıik popýlıatsııasyn saqtaý jáne qalpyna keltirý baǵytyndaǵy tájirıbesine joǵary baǵa berdi. Kezdesý barysynda taraptar kıikterdi qaıta jersindirýge qatysty praktıkalyq máselelerdi birlesip pysyqtaýdy jalǵastyrýǵa ýaǵdalasty.
Azız Abdýhakımov Astanada ótken Óńirlik ekologııalyq sammıttiń joǵary deńgeıde uıymdastyrylǵanyn atap ótip, onyń aıasynda qabyldanǵan bastamalardy qoldady. Óz kezeginde Álibek Qýantyrov osy bastamalardy iske asyrý boıynsha naqty jumystar bastalǵanyn jetkizdi. Atap aıtqanda, «Ortalyq Azııanyń jasyl qalqany» bastamasy men ormandardy qalpyna keltirý baǵytynda tıisti sharalar qabyldanyp jatyr.
Kezdesýde atmosferalyq aýanyń sapasyn jaqsartý máselesine de erekshe nazar aýdaryldy. Taraptar taza aýanyń eki el úshin de mańyzdylyǵyn atap ótip, kásiporyndardan shyǵatyn zııandy shyǵaryndylardy azaıtý boıynsha qabyldanyp jatqan sharalar týraly aqparat almasty. Sondaı-aq shekaralas óńirlerdegi ekologııalyq jaǵdaıdy jaqsartý baǵytynda birlesip jumys isteýge kelisti.
Mınıstrler Ortalyq Azııa elderiniń halyqaralyq alańdarda ortaq ustanym bildirýi baǵytyndaǵy jumysty talqylady. Budan bólek, Halyqaralyq tabıǵatty qorǵaý odaǵynyń (IUCN) qatysýymen Ortalyq Azııanyń Qyzyl kitabyn ázirleý barysynda óńir mamandarynyń kúsh-jigerin biriktirý jóninde ýaǵdalasty.
Taraptar qaldyqtardy basqarý máselelerin de talqylap, osy saladaǵy tájirıbe men ozyq praktıkalar almasýdy jalǵastyrýǵa kelisti.
Kezdesý qorytyndysynda Qazaqstan men Ózbekstan ókilderi talqylanǵan barlyq baǵyt boıynsha tyǵyz yntymaqtastyqty odan ári damytýǵa daıyn ekenderin rastady.
Osyǵan deıin Qazaqstan men Belgııa Kaspıı teńiziniń ekologııasyn saqtaý boıynsha yntymaqtastyqty kúsheıtetini týraly jazdyq.
