Qazaqstan men Ózbekstan qaýipsizdik salasyndaǵy yntymaqtastyqty kúsheıtedi
ASTANA. KAZINFORM — Shymkentte Qazaqstan men Ózbekstan qaýipsizdik keńesteri apparattarynyń segizinshi konsýltatsııalyq kezdesýi ótti, dep habarlaıdy Aqordanyń baspasóz qyzmeti.
Jıynǵa Qazaqstan Respýblıkasy Qaýipsizdik Keńesi Tóraǵasynyń orynbasary Aıda Balaeva men Ózbekstan Respýblıkasy Prezıdenti janyndaǵy Qaýipsizdik Keńesiniń hatshysy Vıktor Mahmýdov tóraǵalyq etti.
Múddeli memlekettik organdardyń ókilderi qatysqan kelissózde qaýipsizdikti qamtamasyz etý salasyndaǵy ekijaqty yntymaqtastyqtyń ózekti máseleleri qaraldy.
— Taraptar halyqaralyq terrorızm men dinı ekstremızmge qarsy is-qımyl, jastardyń radıkaldanýynyń aldyn alý máselelerin talqylady. Sonymen qatar uıymdasqan qylmysqa, esirtkiniń zańsyz tasymalyna, zańsyz kóshi-qonǵa jáne kıberqylmysqa qarsy kúreske nazar aýdaryldy. Tsıfrlyq tehnologııalar men jasandy ıntellektini paıdalanýǵa baılanysty jańa qaterler de jan-jaqty pysyqtaldy, — delingen habarlamada.
Sý jáne ekologııalyq qaýipsizdik, transshekaralyq sý resýrstaryn utymdy paıdalaný, sondaı-aq tótenshe jaǵdaılardyń aldyn alý máseleleri de arnaıy qaraldy. Osy oraıda, Qazaqstan Prezıdentiniń BUU júıesinde Halyqaralyq sý uıymyn qurý, sondaı-aq Klımattyq jáne tehnogendik tótenshe jaǵdaılardy boljaýdyń óńirlik ortalyǵyn ashý týraly bastamalarynyń mańyzy atap ótildi.
Segizinshi konsýltatsııalyq kezdesýdiń qorytyndysy boıynsha Aıda Balaeva men Vıktor Mahmýdov tıisti hattamaǵa qol qoıdy. Sondaı-aq onyń júıeli oryndalýyn qamtamasyz etý úshin birlesken sarapshylar tobyn qurýǵa ýaǵdalasty.
Qaýipsizdik keńesteri apparattarynyń konsýltatsııalary qabyldanǵan yntymaqtastyq josparyna sáıkes turaqty ótkiziledi.
Іs-shara aıasynda delegatsııa basshylary eki el arasyndaǵy dostyq pen uzaqmerzimdi yntymaqtastyqty nyǵaıtý nyshany retinde A.Asqarov atyndaǵy dendrosaıabaqta aǵash otyrǵyzdy.
Osyǵan deıin Prezıdent Qaýipsizdik keńesi apparatyna jańa mindetter júktegenin jazǵanbyz.
