Qazaqstan men Ózbekstan qaýipsizdik keńesteri apparattarynyń keńeıtilgen konsýltatsııasy ótti
Qazaqstan Respýblıkasy Prezıdentiniń kómekshisi - Qaýipsizdik Keńesiniń hatshysy Qalmuhanbet Qasymov pen Ózbekstan Respýblıkasynyń Prezıdenti janyndaǵy Qaýipsizdik Keńesiniń hatshysy Vıktor Mahmýdovtyń tóraǵalyǵymen jáne ortalyq memlekettik organdar basshylarynyń qatysýymen ótken kelissózder barysynda qaýipsizdikti qamtamasyz etýdiń ózekti mindetteri qaraldy.
Taraptar kontrabandaǵa qarsy is-qımyl jáne keden zańnamasyn buzýshylyqtar boıynsha shekaralyq qyzmetter men keden organdarynyń ózara tıimdi árekettestigin arttyrý máselelerin talqylady. Qazaqstan-Ózbekstan memlekettik shekarasyndaǵy ótkizý beketteri men avtomobıl joldaryn qaıta qurý jáne jańǵyrtý, irgeles aýmaqty jaılastyrý jónindegi jol kartasynyń tarmaqtaryn oryndaý barysy qaraldy.
Kelissózderdiń kún tártibine Ortalyq Azııadaǵy tatý kórshilik pen ózara senimdi odan ári nyǵaıtý boıynsha sharalar engizildi. Eki memlekettiń ókilderi Aýǵanstandaǵy jaǵdaıdyń aıasynda óńir qaýipsizdigi jáne onyń turaqty damýy máselelerin talqylady.
Sonymen birge, taraptar dinı ekstremızmniń aldyn alý salasynda jınaqtaǵan tájirıbelerimen jáne usynymdarymen almasty.
Jumys qorytyndysy boıynsha eki eldiń tıisti memlekettik organdaryna naqty tapsyrmalar berildi.