Qazaqstan men Ózbekstan qarym-qatynasy buryn-sońdy bolmaǵan bıik deńgeıge kóterildi — Máýlen Áshimbaev
ASTANA. KAZINFORM — Qazaqstan men Ózbekstannyń qarym-qatynasy senimge negizdelgen. Bul oıdy Senat tóraǵasy Máýlen Áshimbaev ortaǵa saldy.
— Qazaqstan men Ózbekstannyń qarym-qatynasy sońǵy jyldary Prezıdentter Qasym-Jomart Toqaev pen Shavkat Mırzıeevtiń jetekshiligimen buryn-sońdy bolmaǵan bıik deńgeıge kóterildi. Odaqtastyq qarym-qatynas týraly shartqa, memlekettik shekarany delımıtatsııalaý týraly shartqa jáne aldaǵy 10 jylǵa arnalǵan strategııalyq áriptestik shartyna qol qoıyldy. Saıası, ekonomıkalyq jáne mádenı baılanys belsendi damyp jatyr. Biz bir baǵytqa qaraımyz. Bizdi biriktiretin ortaq maqsat — turaqty, órkendegen jáne álemge ashyq Ortalyq Azııa. Álemdik turaqsyzdyqtyń osy bir kúrdeli kezeńinde bizdiń elder arasyndaǵy kez kelgen sharttan da kúshti nárse bar — ol senim, — dedi Máýlen Áshimbaev elordada ótip jatqan qazaq-ózbek zııaly qaýymynyń alǵashqy forýmynda.
Tóraǵanyń málimdeýinshe, Qazaqstan men Ózbekstan eli arasyndaǵy senim eshqandaı qujatta jazylmaǵan jáne arhıvte shań basyp jatpaıdy.
— Senim — eki halyqtyń ózinde, ózara qurmetinde, shynaıy dostyǵynda, mádenı almasýynda jáne adamı qarym-qatynas negizinde jatyr. Osy turǵydan alǵanda mádenı-gýmanıtarlyq sala sheshýshi ról atqarady. Mádenıet, óner, bilim — eshbir saıası daýyl qulata almaıtyn kópir. Olar ortaq tarıhqa, ózara qurmet pen bir-birine degen shynaıy qyzyǵýshylyqqa negizdelgen. Halyqtarymyzdyń mádenıet kúnderi, teatr gastrolderi, bıennale, kitap aýdarmalary, ǵylymı sımpozıýmdar, barlyǵy bizdiń yntymaqtastyǵymyzdy jandandyryp, turaqtylyq beredi. Búgingi zııatkerlik jáne shyǵarmashylyq ókilderiniń kezdesýi ıdeıalarmen, oılarmen jáne josparlarmen almasatyn alańǵa aınalyp, bir-birimizdi tyńdap, ortaq bolashaqqa qaraı taǵy bir qadam jasaýǵa múmkindik beretinine senimdimin, — dep tolyqtyrdy Máýlen Áshimbaev.
Búgin Astanada qazaq-ózbek zııaly qaýymynyń alǵashqy forýmy ótip jatyr. Alǵash uıymdastyrylǵan forýmǵa Senat tóraǵasy Máýlen Áshimbaev jáne Ózbekstan Olıı Májilisi Senatynyń tóraǵasy Tanzıla Narbaeva bastaǵan qazaq-ózbek ǵylymı-shyǵarmashylyq zııaly ókilderi qatysyp jatyr.