Qazaqstan men Ózbekstan geologııalyq barlaý salasyndaǵy yntymaqtastyqty nyǵaıtpaq
TAShKENT. KAZINFORM – Qazaqstan men Ózbekstan geologııalyq barlaý salasyndaǵy baılanystardy tereńdetý maqsatynda birlesken konferentsııa ótkizý múmkindigin qarastyryp jatyr, dep habarlaıdy Kazinform agenttiginiń menshikti tilshisi.
Atalǵan bastama Qazaqstannyń Ózbekstandaǵy elshisi Beıbit Atamqulov pen kórshiles eldiń Taý-ken ónerkásibi jáne geologııa mınıstri Bobır Islamov arasynda ótken kezdesýde kóterildi.
Taraptar jaýapty ulttyq kompanııalar arasyndaǵy baılanys, geologııalyq barlaý jobalaryn birlesip iske asyrý, geologııalyq-tehnıkalyq derektermen almasý máselelerine toqtaldy.
Aıta keteıik, bıyl 20 naýryzda Hıýada ótken Qazaqstan men Ózbekstan syrtqy ister mınıstrleriniń alǵashqy otyrysynda vedomstvo basshylary strategııalyq mańyzdy mıneraldar boıynsha birlesken jumys tobyn qurýǵa ýaǵdalasqan bolatyn.
Tıisinshe, bıyl resmı Astana men Tashkent sarapshylar deńgeıinde usynys ázirleýdi josparlap otyr. Ol úshin jaýapty mınıstrlikter, ǵylymı ınstıtýttar jáne bıznes ókilderiniń qatysýymen birlesken konferentsııa ótýi múmkin.
Eske salaıyq, byltyr Ózbekstannyń birneshe óńirinde ýran keni tabyldy.
Sonymen qatar Malaızııa Ózbekstandaǵy ken oryndaryn ıgerýge múddeli.
Buǵan qosa Ózbekstan gaz óndirisin ulǵaıtý maqsatynda bıyl 15 ýchaskede geologııalyq barlaý júrgizbek.