Qazaqstan men Ózbekstan ǵarysh salasyndaǵy seriktestikti nyǵaıtýǵa nıetti

TAShKENT. KAZINFORM – Búginde Qazaqstan men Ózbekstan barlyq saladaǵy baılanystardy nyǵaıtyp keledi. Olardyń ishinde ǵarysh keńistigin birlesip ıgerý de basym baǵyt sanalady. Birneshe jyl buryn qos memleket sala mamandaryn oqytý baǵdarlamasyn júzege asyrsa, endigi kezekte jańa spýtnık qurastyrý jobalaryn talqylap, aqparat almasý isin joǵary deńgeıge kóterip jatyr, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

Bizdiń elimizben Ózbekstan ǵarysh keńistigin seriktestikte ıgerip keledi. Máselen, qos memleket yntymaqtastyq aıasynda monıtorıngimen aınalysatyn mamandardy daıarlap, tájirıbe almasyp otyrady.

«Ózbekǵarysh» agenttigi qurylǵan sátten bastap «Qazǵarysh» oǵan mańyzdy seriktes boldy. Bastapqyda, ıaǵnı 2021 jyldyń sońynda ǵaryshty beıbit maqsatta ıgerý jónindegi eki eldiń úkimetaralyq kelisimi bekitildi. Sonyń aıasynda qyzmetkerlerimizdi oqytýǵa baǵyttalǵan nátıjeli jumys atqaryldy. Ári ǵaryshtyq monıtorıng tájirıbesi úlgi retinde alyndy. Birqatar pılottyq joba iske asty», - dep toqtaldy Ózbekstan ǵaryshtyq tehnologııa jáne zertteý agenttiginiń bólim basshysy Ismaıl Rasýlov.

Ázirge kórshiles eldiń qashyqtan zondtaýǵa arnalǵan óz spýtnıgi joq. Buǵan qaramastan Ózbekstanda ǵaryshtyq monıtorıng memlekettik deńgeıde bekitilgen. ıAǵnı, kosmostan jasalǵan sýretter negizinde alynǵan aqparattarǵa qatysty qajetti sharalar úkimet dárejesinde qabyldanady. Al Qazaqstanda ǵaryshtyq monıtorıngi memlekettik deńgeıdegi mártebege ıe emes.

Eske sala keteıik, búgin – búkilálemdik avıatsııa jáne kosmonavtıka kúni.