Qazaqstan men Ózbekstan energııa resýrstaryna kedendik baqylaýdy kúsheıtedi
Búgin Senattyń jalpy otyrysynda «Qazaqstan Úkimeti men Ózbekstan Úkimeti arasyndaǵy Qazaqstan-Ózbekstan kedendik shekarasy arqyly qubyrjol kóligimen jáne elektr berý jelileri boıynsha energııa resýrstaryn ótkizý kezindegi birlesken kedendik baqylaý týraly kelisimdi ratıfıkatsııalaý týraly» Zańy maquldandy, dep habarlaıdy QazAqparat tilshisi.
Bul kelisimge 2021 jyly 6 jeltoqsanda Astana qalasynda Ózbekstan Respýblıkasy Prezıdentiniń sapary kezinde qol qoıyldy. Qujat aıasynda qazaq-ózbek keden shekarasy arqyly ótkiziletin energııalyq qorlardy ótkizý kezinde birikken kedendik baqylaý erejeleri usynyldy.
Kelisimniń maqsaty – eki eldiń keden shekarasy arqyly qubyr jáne elektr energııasyn berý jelileri boıynsha ótkiziletin energııa resýrstaryna baqylaýdyń tıimdiligin arttyrý.
«Álemdik naryqtaǵy boljamdalǵan munaı baǵasy elderdiń ekonomıkalyq damýymen qatar, jalpylaı túrde áleýmettik mindetterdi sheshýde negizgi kórsetkish ekendigi jaıdan-jaı emes. EAEO aıasynda jańa quqyqtyq tártip ornatý jaǵdaıynda qubyrjol kóligimen jáne elektr energııasy jelileri boıynsha taýarlardy ótkizýge baılanysty qatynastardy retteýde basqasha sapaly tásil qajet. Sondyqtan Qazaqstannyń tıisti halyqaralyq sharttarynda energoresýrstardy olardyń ózgeshelikterimen qatar, keden shekarasy arqyly ótkizý máseleleri keshendi túrde sheshilip jatyr», – dedi senator Amangeldi Nuǵmanov.
Kelisimdi ratıfıkatsııalaý Qazaqstan-Ózbekstan keden shekarasy arqyly qubyrjol kóligimen jáne elektr energııasyn berý jelileri boıynsha ótkiziletin energııa resýrstaryna qatysty kedendik-tarıftik retteý sharalaryn saqtaýdy qamtamasyz etýge, sondaı-aq kedendik deklaratsııalaý kezinde málimdelgen aqparattyń durystyǵyn qamtamasyz etýge jáne kedendik baqylaýdyń tıimdiligin arttyrýǵa múmkindik beredi.
Kelisimde memleketterdiń keden ister salasyndaǵy ulttyq zańnamasy talaptaryn buzý derekteri jaıynda aqparat almasý qarastyrylǵan.
