Qazaqstan men Ózbekstan Energetıkalyq yntymaqtastyq keńesin qurady
ASTANA. QazAqparat - Qazaqstan men Ózbekstan energetıkalyq saladaǵy yntymaqtastyq boıynsha Úılestirý keńesin qurady. Bul týraly Parlament Májilisiniń jalpy otyrysynda QR Energetıka mınıstri Qanat Bozymbaev málim etti, dep habarlaıdy QazAqparat tilshisi.
«Kelisimde Úılestirý keńesin qurý kózdelgen. Bul keńes energetıka salasynda ekijaqty yntymaqtastyqtyń barlyq máselelerin sheshedi. Osyndaı keńesti qurý eki eldiń qarym-qatynasyn odan ári jaqsartyp, munaı ónimderi, gaz, munaı-hımııasy, elektr energetıkasy salalarynda ekijaqty saýda aıasynda kóptegen máselelerdi keshendi túrde sheshedi», - dedi Qanat Bozymbaev.
Budan buryn habarlanǵandaı, Parlament Májilisiniń jalpy otyrysynda «Qazaqstan Úkimeti men Ózbekstan Úkimeti arasyndaǵy Energetıka salasyndaǵy yntymaqtastyqtyń keıbir máseleleri týraly negizdemelik kelisimdi ratıfıkatsııalaý týraly» zań jobasy maquldandy.
Búginde eki el arasynda munaı-gaz jetkizý sektoryndaǵy ózara is-qımyl jolǵa qoıyldy. QR Prezıdentiniń 2017 jylǵy 16 qyrkúıekte Ózbekstanǵa jasaǵan resmı sapary barysynda eki el úkimetteri arasynda energetıka salasy boıynsha negizdemelik kelisimge qol qoıyldy. Osy kelisim negizinde eki el arasyndaǵy munaı-gaz, munaı-gaz-hımııasy jáne elektr energetıkasy salasyndaǵy yntymaqtastyq damytylady.
