Qazaqstan men Ózbekstan eńbekshi mıgranttardyń quqyqtaryn qorǵaý týraly kelisimge keldi
Senattyń jalpy otyrysynda «Qazaqstan Respýblıkasynyń Úkimeti men Ózbekstan Respýblıkasynyń Úkimeti arasyndaǵy Qazaqstan Respýblıkasynyń azamattary bolyp tabylatyn eńbekshi kóship-qonýshylardyń Ózbekstan Respýblıkasyndaǵy jáne Ózbekstan Respýblıkasynyń azamattary bolyp tabylatyn eńbekshi kóship-qonýshylardyń Qazaqstan Respýblıkasyndaǵy eńbek qyzmeti jáne quqyqtaryn qorǵaý týraly kelisimdi ratıfıkatsııalaý týraly» zań jobasy jaıynda QR Eńbek jáne halyqty áleýmettik qorǵaý mınıstri Birjan Nurymbetov baıandady.
«Kelisimge 2019 jyly 15 sáýirde Tashkent qalasynda Memleket basshysy Qasym-Jomart Toqaevtyń memlekettik sapary barysynda qol qoıylǵan bolatyn. Kelisimniń maqsattary - taraptardyń memleketterindegi kóshi-qon aǵyndaryn retteý jáne zańsyz eńbek qyzmetin boldyrmaý jónindegi sharalardy júzege asyrýy. Kelisimdi ratıfıkatsııalaý eki eldiń arasyndaǵy eńbek kóshi-qony protsesin retteý salasyndaǵy yntymaqtastyqtyń nyǵaıýyna yqpal etedi dep sanaımyz», - dedi ol.
Kelisimge sáıkes, eńbekshi mıgranttar qabyldaýshy memlekettiń zańdary men eńbek shartynyń talaptaryna sáıkes demalýǵa, aınalasyndaǵy adamdar úshin qaýip tóndiretin aýrýlar kezinde tegin medıtsınalyq kómektiń kepildendirilgen kólemin alýǵa quqyly bolady. Sonymen qatar tegin medıtsınalyq kómektiń kepildik berilgen kóleminiń tizimine kirmegen medıtsınalyq qyzmetter aqyly negizde nemese erikti medıtsınalyq saqtandyrý aıasynda kórsetiledi.
Eńbekshi mıgranttardyń tólemi men basqa da eńbek jaǵdaılary qabyldaýshy memlekettiń zańnamasyna sáıkes jumys berýshimen eńbek shartynda retteledi. Bul rette eńbekaqy tómen bolmaýǵa, al eńbek jaǵdaılary qabyldaýshy memlekettiń azamattaryna qaraǵanda qolaılylyǵy jaǵynan tómen bolmaýǵa tıis.
Zań jobasy talqylanǵannan keıin senatorlar oǵan biraýyzdan qoldaý bildirip, qujat qabyldandy.
