Qazaqstan men Ózbekstan ekonomıkalyq statıstıka almasýdy jyldamdatady
TAShKENT. QazAqparat - Qazaqstan Respýblıkasynyń Ózbekstandaǵy Elshisi Erik Ótembaev Ózbekstan Respýblıkasy Memlekettik statıstıka komıtetiniń tóraǵasy Bahodır Begalovpen kezdesti, dep habar beredi «QazAqparat» HAA-nyń menshikti tilshisi.
Suhbatta taraptar Qazaqstan men Ózbekstannyń statıstıka organdary arasyndaǵy baılanystardy keńeıtý múmkindikteri, Qazaqstan men Ózbekstan prezıdentteriniń 2020 jylǵa qaraı ózara saýda aınalymyn 5 mlrd dollarǵa deıin arttyrý týraly tapsyrmalaryn oryndaý jumystaryn jandandyrý, sondaı-aq ózara saýda statıstıkasyn birkelki túsinýge kedergi jasaıtyn tosqaýyldardy joıý máselelerin talqylady.
Qazaqstan Elshisi Erik Ótembaev ózbek tarapyn shekaralyq saýda baılanystaryn jandandyrý jumystary týraly egjeı-tegjeıli habardar etip, birikken óndiris oryndaryn qurý jobalary jaıynda áńgimeledi. Al memstatkom tóraǵasy Bahodır Begalov júrgizilip jatqan jumystardyń mańyzyn tilge tıek etip, Qazaqstan men Ózbekstan arasynda statıstıkalyq jyldam aqparat almasýǵa jaǵdaı jasaý baǵytyndaǵy negizgi jobalar týraly aqparat berdi.
Kezdesý qorytyndylaryna oraı, taraptar Qazaqstan Respýblıkasy Ulttyq ekonomıka mınıstrliginiń Statıstıka komıteti men Ózbekstan Respýblıkasynyń Memlekettik statıstıka komıtetiniń arasynda ózara túsinistik týraly memorandýmǵa qol qoıýǵa daıyndyq jumystaryn jyldamdatýǵa kelisti.
