Qazaqstan men Ózbekstan eki eldiń qalalaryn jalǵaıtyn temirjol salýdy josparlap otyr
Taraptar ekijaqty yntymaqtastyqty tereńdetý perspektıvalaryn talqylady. Onyń ishinde ınfraqurylymdyq jobalarǵa erekshe nazar aýdardy, dep habarlaıdy QazAqparat QR Indýstrııa jáne ınfraqurylymdyq damý mınıstrliginiń Telegram kanalyna silteme jasap.
Qazaqstan men Ózbekstan eki eldiń týrıstik áleýetin arttyrýǵa múmkindik beretin joǵary jyldamdyqty Túrkistan – Shymkent – Tashkent temirjol jolaýshylar qatynasyn júzege asyrý boıynsha jumystar júrgizýde. Budan basqa, Ózbekstan aýmaǵyna shyǵatyn Maqtaral – Darbaza jańa jelisin salý josparda bar. Ol joba Saryaǵash ótkeli pýnktiniń júktemesin edáýir azaıtady.
Sonymen qatar, Túrkistannan Tashkentke deıin sozylatyn jańa joǵary jyldamdyqty magıstraldy iske qosý kózdelip otyr.
Sondaı-aq, mınıstr men elshi áýe qatynasy jaıyn talqylady. Koronavırýs pandemııasyna qaramastan, eki el arasyndaǵy reıster turaqty oryndalýda. Bolashaqta olardyń sanyn ulǵaıtý, sondaı - aq Ózbekstannyń Úrgench, Samarqand, Núkis qalalarynan Qazaqstannyń Túrkistan, Aqtaý jáne Taraz qalalaryna jańa baǵyttar ashý josparda bar.
Infraqurylymdyq jobalardan bólek kezdesýge qatysýshylar ónerkásiptik jobalarǵa nazar aýdardy. Taraptar Qazaqstandaǵy mashına jasaý salasyna mamandanǵan, sondaı-aq Ózbekstan aýmaǵynda farmatsevtıkalyq ónim shyǵaratyn birlesken kásiporyndar qurmaqshy. Sondaı-aq, Shymkentte dárilik zattar jáne gıgıenalyq buıymdar shyǵaratyn zaýyt salý josparlanýda.
