Qazaqstan men Ózbekstan densaýlyq saqtaý salasyndaǵy yntymaqtastyqty tereńdete túsedi
TAShKENT. KAZINFORM — Búgin Tashkentte «Qazaqstan — Ózbekstan: Densaýlyq saqtaý, tehnologııa jáne kadr salasyndaǵy yntymaqtastyq» halyqaralyq forýmy ótti, dep habarlaıdy Kazinform agenttiginiń menshikti tilshisi.
Atalǵan is-shara Ózbekstanda ótken Qazaqstannyń medıtsına kúnderin qorytyndylaýǵa arnaldy. Oǵan eki eldiń densaýlyq saqtaý mınıstrleri, dıplomattar, Dúnıejúzilik densaýlyq saqtaý uıymynyń Ózbekstandaǵy ókilderi qatysty.
— Bizdiń elderimiz densaýlyq saqtaý salasyn damytý úshin tyń tehnologııalardy engizip jatyr. Qazaqstan men Ózbekstan tsıfrlyq transformatsııa jáne ınnovatsııalyq sheshimder arqyly mańyzdy máselelerdi sheship keledi. Biz qos memleket arasyndaǵy yntymaqtastyq óńirdegi densaýlyq saqtaý salasynyń jańa júıesin qurýǵa serpin beretinine senimdimiz, — dedi forýmda sóz sóılegen QR Densaýlyq saqtaý mınıstri Aqmaral Álnazarova.
Ózbekstandaǵy Qazaqstannyń medıtsına kúnderi aıasynda 100-ge jýyq otandyq bilikti maman Tashkent, Ferǵana, Samarqand, Buharada jáne Qaraqalpaqstannyń Núkis qalasynda bolyp, tájirıbe almasty, otalar jasady.
5 kúnge jalǵasqan is-shara barysynda dárigerler 3 myńǵa jýyq ózbekstandyqqa medıtsınalyq keńes berdi. Sonymen qatar, kórshi eldiń beldi ortalyqtarynda jasalǵan 60-tan astam kúrdeli otaǵa qatysyp, kómek kórsetti.
— Ózbekstanda osyndaı aýqymdy is-sharany ótkizý óte mańyzdy bastama boldy. Onyń aıasynda biz ózara is-qımyldy pysyqtap, ozyq jobalardy birlesip ilgeriletý múmkindigin qarastyrdyq, — dep málim etti Ózbekstannyń Densaýlyq saqtaý mınıstri Asılbek Hýdaıarov.
Forým barysynda belgili bolǵandaı, búginde Qazaqstannyń medıtsınalyq joǵary oqý oryndarynda Ózbekstannyń 700-ge jýyq azamaty bilim alyp jatyr. Al Tashkentte 100-den astam qazaqstandyq oqıdy.
Іs-sharanyń qorytyndysy boıynsha Qazaqstan men Ózbekstannyń ǵylymı ortalyqtary, jetekshi klınıkalary, medıtsınalyq ýnıversıtetteri arasynda yntymaqtastyq týraly 30-ǵa jýyq memorandýmǵa qol qoıyldy.