Qazaqstan men Ózbekstan delegatsııalary tótenshe jaǵdaı saldaryn joıý máselelerin talqylady
NUR-SULTAN. QazAqparat - Qazaqstan Respýblıkasy men Ózbekstan Respýblıkasynyń úkimettik delegatsııalary Ózbekstannyń Syrdarııa aýdany men Qazaqstannyń Túrkistan oblysynyń aýmaqtarynyń bir bóliginiń sý basýyna ákelgen Sardoba sý qoımasyndaǵy tótenshe jaǵdaı saldaryn joıý jónindegi máselelerdi birlesip sheshý jónindegi kezdesý ótkizdi, dep habarlaıdy primeminister.kz.
QR Premer-Mınıstriniń orynbasary Roman Sklıardyń jetekshiligimen Qazaqstan Respýblıkasynyń delegatsııasynyń quramyna Túrkistan oblysynyń ákimi Ómirzaq Shókeev, QR ekologııa, geologııa jáne tabıǵı resýrstar mınıstri Maǵzum Myrzaǵalıev pen Qazaqstannyń Ózbekstandaǵy elshisi Darhan Satybaldy kirdi.
Premer-Mınıstrdiń orynbasary S. Ýmýrzakov bastaǵan Ózbekstan Respýblıkasynyń delegatsııasynyń quramyna ÓR sý sharýashylyǵy mınıstri Sh. Hamraev pen Syrdarııa oblysynyń hokımi G. Mırzaev kirdi.
Úkimettik delegatsııalar eki eldiń sý astynda qalǵan aýmaqtaryn tikushaqpen ushyp aralap shyqty, onyń barysynda taraptar Sardoba sý qoımasynyń dambasynan sý aǵynynyń tolyq toqtaǵanyna kóz jetkizdi.
Osy kúni kelissóz júrgizildi, onda taraptar oryn alǵan jaǵdaıdy talqylap, tótenshe jaǵdaıdyń saldaryn joıý boıynsha birlesken jumysty atqarýǵa kelisti.
Qazirgi tańda ózbek tarapy Ózbekstan aýmaǵynda bógettiń buzylýynyń saldaryn joıý jumystaryn júrgizýmen qatar, Túrkistan oblysyna, eń aldymen Fırdoýsı jáne Órgebas aýyldaryna, sý basý saldaryn joıýǵa járdemdesý úshin 100-den astam tehnıka men mamandardy jibergen.
Kelissóz kezinde taraptar Sardoba sý qoımasyn qalpyna keltirý máselesi jóninde ózara kelisilgen jumystardy uıymdastyrý týraly kelisimge qol jetkizdi.
Kezdesý sońynda taraptar eki el arasyndaǵy dástúrli dostyq pen strategııalyq áriptestik sabaqtastyǵyndaǵy tyǵyz yntymaqtastyǵyn odan ári jalǵastyrýǵa nıettestigin bildirdi.
