Qazaqstan men Ózbekstan bırjalary jemis, kókónis ónimderin birlesip satýǵa kelisti
ASTANA. KAZINFORM – Qazaqstan men Ózbekstannyń taýar bırjalary arasyndaǵy kelisim kókónister men jemisterdiń saýdasyn jeńildetýge, onyń jyldamdyǵy men ashyqtyǵyn arttyrýǵa baǵyttalǵan, dep jazady Kazinform agenttiginiń menshikti tilshisi.
Bul halyqty turaqty baǵa jáne sapaly ónimmen senimdi qamtamasyz etýge kómektesedi.
«Bırjalyq taýar naryǵy-2025» halyqaralyq forýmynyń qorytyndysy boıynsha «Kaspıı» taýar bırjasy» AQ men «Ózbek respýblıkalyq taýar-shıkizat bırjasy» AQ arasynda yntymaqtastyq jáne birlesken qyzmet týraly kelisimge qol qoıyldy.
Qol qoıylǵan kelisim elektrondyq saýda platformalaryn ıntegratsııalaýmen qatar, jemis-kókónis jáne ózge de ónimderdiń bırjalyq saýdasy salasyndaǵy ornyqty jáne ózara tıimdi áriptestikti qalyptastyrýǵa baǵyttalǵan. Bul ásirese aýyl sharýashylyǵy óndirisiniń joǵary kólemi belsendi transshekaralyq saýdamen ushtastyrylǵan Ortalyq Azııa óńiri úshin mańyzdy.
Seriktestiktiń negizgi maqsattarynyń qatarynda Qazaqstan men Ózbekstan arasyndaǵy ekijaqty saýdany jandandyrý, saýda operatsııalarynyń ashyqtyǵy men senimdiligin arttyrý, eksporttyq-ımporttyq mámileler úshin qolaıly jaǵdaılar jasaý, sondaı-aq eki taraptyń halyqaralyq agroazyq-túlik naryqtaryndaǵy ustanymdaryn nyǵaıtý bar.
Taraptar saýda rásimderin jeńildetýge jáne tranzaktsııalyq shyǵyndardy tómendetýge yqpal etetin birlesken tetikterdi ázirleýge jáne engizýge nıetti.
- Biz úshin ózbek tarapymen yntymaqtastyq –biryńǵaı jáne tıimdi saýda keńistigin qurý boıynsha jańa múmkindikterdi ashady. Biz halyqaralyq naryqtarda taýarlardy ilgeriletý strategııalaryn birlesip ázirleýdi, jemis-kókónis ónimderiniń saýda dınamıkasyn jaqsy túsiný úshin taldaý men zertteýler júrgizýdi josparlap otyrmyz.
Mańyzdy baǵyt — bul sapa standarttary, sertıfıkattaý jáne ónimniń qaýipsizdigi. Biz sondaı-aq jetkizilimge qolaıly jaǵdaı jasaý úshin logıstıka salasyndaǵy yntymaqtastyq týraly jáne tsıfrlyq sheshimder men bırjalyq tehnologııalar salasynda tájirıbe almasý týraly kelistik, - dep atap ótti «Kaspıı» taýar bırjasy» AQ prezıdenti Murat Qadısov.
Kelisim nátıjesinde oqý kýrstaryn uıymdastyrýdy, taldamalyq zertteýler júrgizýdi jáne bırjalyq saýdaǵa áser etetin sharalar týraly aqparat almasýdy qosa alǵanda, bıznes úshin turaqty úılestirý kezdesýleri men is-sharalaryn ótkizý josparlanýda.
Alǵashqy birlesken pılottyq saýda-sattyq 2025 jyly bastalady dep kútilýde.
Aıta keteıik, Ózbekstan Qazaqstanmen shekaradaǵy ótkizý pýnktterine «jasyl» jáne «qyzyl» dáliz júıesin engizbek.