Qazaqstan men Ózbekstan basshylary ekijaqty qarym-qatynasqa tyń serpin bere bildi - Qarın
Erlan Qarınniń aıtýynsha, Memleket basshysynyń kórshiles elge jasaǵan saparyna memlekettik mártebe berilgen.
«Qos tarap ta bul issaparǵa ozyq ári tarıhı dep baǵa berip jatyr. Jáne bul minezdemeler kezekti dıplomatııalyq polıtes emes, naqty jaǵdaıdyń kórinisi ekeni sózsiz. Birsypyra qujattarǵa qol qoıylyp, seriktestiktiń kókjıekteri keńeıe tústi, joǵary deńgeıde kútip alýdyń jańa dástúri paıda boldy. Ózbek taraby qazaqtandyq kóshbasshynyń kelgenine óte qatty daıyndalyp, tipti baǵdarlamaǵa Tóle bı kesenesine bas suǵýdy, Nursultan Nazarbaevtyń kitabyn ózbek tilinde shyǵarýdy qosypty», - deıli ol Feısbýktegi paraqshasynda.
Qarın óz sózinde ózbek basshysynyń Qazaqstan Prezıdentine degen erekshe yqylasyn atap ótip, Nursultan Nazarbaevtyń ótken jyldyń qyrkúıek aıynda Ózbekstanǵa barǵanyn eske alady.
«Bul sapar qazaqtandyq-ózbekstandyq qarym-qatynas qandaı mazmunda órbıtinin aıqyndap berdi. O basta ózge de boljamdar aıtylǵan edi. Alaıda qos eldiń kóshbasshylary bir jyldyń ishinde ǵana ekijaqty qarym-qatynasqa tyń serpin bere bildi. Ótken jyldyń qyrkúıek aıynda Nursultan Nazarbaev pen Shavkat Mırzıeev jeti márte telefon arqyly sóılesken edi. Naýryz aıynda Ózbekstan prezıdenti Qazaqstanǵa resmı sapar jasap, odan keıin arada birer aptadan soń eki eldiń basshylary Saryaǵashta kezdesken bolatyn. Shildede Ózbekstan kóshbasshysy Shańhaı yntymaqtastyq uıymyna múshe elderdiń basshylary Keńesi aıasynda Astanada bolǵan edi. Qyrkúıek aıynyń basynda ǵana Shavkat Mırzıeev Islam yntymaqtastyǵy uıymynyń sammıtine qatysqan», - deıdi Qarın.
Qarınniń aıtýynsha, eki jaqty saýda 35 paıyzǵa artqan. Sonymen qatar, eki eldiń arasynda jospar boıynsha shekaralastyq turǵysynda máseleler sheshilýde.
«Eki kóshbasshyda aımaqtyq seriktestik protsesine dem berýge tyrysyp jatyr. Sondyqtan, qazaq-ózbek qarym-qatynasynyń jandanýy arqyly jalpy Ortalyq Azııadaǵy aımaqtyq seriktestikti qaıta qosýǵa múmkindik týyp otyr», - deıdi ol.
Eske sala ketsek, Qazaqstan Prezıdenti Nursultan Nazarbaev Ózbekstan men Túrikmenstan eline resmı saparmen bardy.
