Qazaqstan men Ózbekstan basshylary eki el yntymaqtastyǵyn nyǵaıtý máselelerin talqylady
Ózbekstan Prezıdentiniń rezıdentsııasynda saltanatty qarsy alý rásimi aıaqtalǵan soń eki el kóshbasshylary shaǵyn jáne keńeıtilgen quramda kelissózder ótkizdi.
Shavkat Mırzıeev Nursultan Nazarbaevqa shynaıy rızashylyǵyn bildirip, barsha Qazaqstan halqyna degen zor qurmetin jetkizdi.
«Osy jyldy eki eldiń qarym-qatynasyndaǵy tarıhı jyl dep aıtýǵa tolyq negiz bar. Memleketterimiz arasynda ekonomıkanyń barlyq salasy boıynsha aıtarlyqtaı ilgerileýshilik baıqalýda. Bul bizdiń altynshy kezdesýimiz. Ol baýyrlas eki el arasyndaǵy dostyq nıetti bildiredi», - dedi Ózbekstan Prezıdenti.
Shavkat Mırzıeev Qazaqstannyń «EKSPO-2017» halyqaralyq kórmesin jáne Islam yntymaqtastyǵy uıymynyń ǵylym jáne tehnologııalar jónindegi birinshi sammıtin joǵary deńgeıde ótkizýi Nursultan Nazarbaevtyń bıik bedeliniń arqasynda múmkin bolǵanyn atap ótti.
Qazaqstan Prezıdenti ózbek kóshbasshysyna saparmen kelýge shaqyrǵany jáne qonaqjaılyq tanytqany úshin rızashylyq bildirip, ekijaqty qarym-qatynastardyń qarqyndy damyp kele jatqanyn, sondaı-aq ony odan ári keńeıtýdiń áleýeti zor ekenin aıtty.
«Siz az ýaqyt ishinde ekijaqty qarym-qatynasty tabysty damytýǵa zor úles qostyńyz. Biz kezdesýlerimizdiń arqasynda kóptegen túıitkildi máselelerdi sheshe aldyq. Bizdiń tilimiz, mádenıetimiz, dinimiz ortaq. Sondyqtan, bizde tyǵyz yntymaqtasýdan basqa jol joq. Ózara is-qımylymyz tıimdi bolý úshin naqty ister atqaryp, bir-birimizdi qoldaýymyz qajet», - dedi Memleket basshysy.
Nursultan Nazarbaev Ózbekstannyń óńirde mańyzdy ról atqaratynyna erekshe toqtalyp, Shavkat Mırzıeevtiń eki eldiń iskerlik yntymaqtastyǵyn jandandyrýǵa aıryqsha úles qosqanyn atap ótti.
«Siz Prezıdent laýazymyndaǵy bir jyl ishinde kóp jumys atqardyńyz. Sizdiń valıýtalyq retteý, shekarany ashý, bıznesti damytý úshin jaǵdaı jasaý jóninde qabyldaǵan sheshimderińizdi tarıhı sheshimder dep ataýǵa bolady. Bizdiń iskerlik qarym-qatynastarymyz ózara tıimdi jaǵdaılarǵa negizdelýge tıis», - dedi Qazaqstan Prezıdenti.
Sondaı-aq, kelissóz barysynda saýda-ekonomıkalyq, ınvestıtsııa, aýyl sharýashylyǵy, kólik-tranzıt, áskerı-ónerkásip jáne mádenı-gýmanıtarlyq salalaryndaǵy eki el arasyndaǵy yntymaqtastyqty nyǵaıtý máseleleri talqylandy.
