Qazaqstan men Ózbekstan azamattarynyń eki el aýmaǵynda kedergisiz bolýyna jaǵdaı jasalady – Senat tóraǵasy
ASTANA. KAZINFORM — Qazqstan men Ózbekstan azamattaryna eki eldiń aýmaǵyna kedergisiz barýyna jaǵdaı jasaıtyn jańa norma saýda-ekonomıkalyq qarym-qatynastardy damytýǵa tikeleı áser etedi. Búgin Senattyń jalpy otyrysynda Qazaqstan men Ózbekstan azamattarynyń ózara saparlary týraly zańdy qaraý kezinde Palata tóraǵasy Máýlen Áshimbaev osyndaı pikir bildirdi.
«Ózbekstan bizge eń jaqyn memleketterdiń biri. Biz – baýyrlas, odaqtas eldermiz. Tıisti kelisimderimiz bar. Bizdiń shyqqan tegimiz bir, tilimiz uqsas, dinimiz ortaq. Mádenıetimiz ben salt-dástúrlerimizdiń de tamyry bir. Sondyqtan baýyrlas elmen qarym-qatynasymyzdy ári qaraı damyta berýimiz kerek. Ekonomıkalyq, áleýmettik, basqa da saladaǵy baılanystardy arttyrýdyń birden-bir kepili – ol adamdardyń ózara saparyna qolaıly múmkindik jasaý. Eki eldiń azamattary bir-biriniń aýmaǵynda kedergisiz 30 kún bolsa, mundaı qadam saýda-ekonomıkalyq jáne basqa da qarym-qatynastardy damytýǵa tikeleı áser etetini anyq», – dedi Máýlen Áshimbaev.
Sonymen qatar Senat Spıkeri Kelisim tolyǵymen Qazaqstannyń saıasatymen sáıkes keletinin aıtty. Sondyqtan Qujat normalaryna durys kózqaras qalyptastyrǵan jón.
M. Áshimbaev Kelisimniń eki memleketke ne beretinine kóbirek kóńil bólýdiń jáne qazirgideı kúrdeli kezeńde syrtqy qarym-qatynastardy jan-jaqty damytýdyń mańyzy zor ekenine nazar aýdardy.
Aıta keteıik, búgin Senat otyrysynda depýtattar «2000 jylǵy 7 shildedegi Qazaqstan Respýblıkasynyń Úkimeti men Ózbekstan Respýblıkasynyń Úkimeti arasyndaǵy Azamattardyń ózara saparlarynyń sharttary týraly kelisimge ózgerister engizý týraly hattamany ratıfıkatsııalaý týraly» zańdy da qarap, maquldady. https://kaz.inform.kz/news/kazakstan-men-ozbekstan-azamattarinin-ozara-saparina-arnalgan-talaptar-zhenldeyd-afc833/
Hattamada, eger taraptar azamattarynyń eki elde bolý kezeńi shekarany kesip ótken kezden bastap kúntizbelik 30 kúnnen aspaıtyn bolsa, quzyretti organdarda tirkeýsiz olardyń aýmaqtarynda bolýynyń ońaılatylǵan tártibi qarastyrylǵan. Osylaısha, Hattamada azamattardyń ekinshi Tarap memleketiniń aýmaǵynda bolýynyń merzimi ýaqytsha tirkeýsiz 5 kúnnen 30 kúnge deıin ulǵaıtylyp otyr.
