Qazaqstan men Ózbekstan aýyl sharýashylyǵy salasyndaǵy Jol kartasyn qabyldady
NUR-SULTAN. QazAqparat – QR Premer-Mınıstri Asqar Mamın Ózbekstan Respýblıkasynyń (ÓR) aýyl sharýashylyǵy mınıstri Jamshıd Hodjaevtyń jetekshiligimen kelgen delegatsııany qabyldady, dep habarlaıdy primeminister.kz.
«Qazaqstannyń Tuńǵysh Prezıdenti – Elbasy Nursultan Nazarbaev pen Ózbekstan Prezıdenti Islam Karımovtyń kúsh-jigeriniń arqasynda bizdiń elderimizdiń arasyndaǵy yntymaqtastyq sapalyq turǵyda jańa deńgeıge shyqty. Memleket basshysy Qasym-Jomart Toqaev Ózbekstanmen strategııalyq seriktestikti odan ári nyǵaıtý baǵytyn jalǵastyrýda», — dedi A. Mamın.
Premer-Mınıstr agroónerkásiptik keshen ónimderin ózara jetkizýdi arttyrý, ınvestıtsııalyq jobalardy birlesip júzege asyrý jáne úshinshi elderdiń naryǵyna shyǵý úshin edáýir áleýettiń bar ekenin atap ótti.
Bıyl 9 aıda QR jáne ÓR arasyndaǵy aýyl sharýashylyǵy shıkizaty óńdelgen ónimderi men aýyl sharýashylyǵy ónimderiniń taýar aınalymy $770 mln-ǵa jýyqtady. Qazaqstannyń Ózbekstanǵa eksportynyń negizgi kólemi bıdaı men meslınge, bıdaı nemese bıdaı-qara bıdaı unyna, kunbaǵys dánine, qantqa, iri qara malǵa, bıdaı qaldyǵyna tıesili. Ózbekstan Qazaqstanǵa negizinen shıe men qyzyl shıe, balǵyn júzim, órik, qyzanaq, shabdaly, qurma, kókónis eksporttaıdy.
Kelissózder qorytyndysy boıynsha Úkimet basshysynyń qatysýymen eki eldiń aýyl sharýashylyǵy mınıstrleri QR men ÓR arasynda aýyl sharýashylyǵy salasynda ortasha merzimdi prespektıvaǵa yntymaqtastyqty jandandyrý jónindegi Jol kartasyna qol qoıdy.
Qujat aýyl sharýashylyǵy ǵylymy, óndiris, sertıfıkattaý, saýda, tsıfrlandyrý, veterınarııa jáne mal sharýashylyǵy, ósimdikter karantıni salalarynda 2019-2024 jyldary ózara is-qımyldy damytý sharalaryn qamtıdy.
