Qazaqstan men Ózbekstan aýa sapasyn jaqsartý baǵytynda birlesken jumys tobyn qurady
ASTANA. KAZINFORM — Sapar barysynda qazaqstandyq delegatsııa Ózbekstanda júzege asyrylyp jatqan ekologııalyq jobalarmen, sonyń ishinde Tashkent jylý elektr stantsııasyndaǵy zamanaýı gaz tazartý tehnologııalarymen, shyǵaryndylardy azaıtý sharalarymen jáne kólikterge ekologııalyq stıkerlerdi engizýmen tanysty.
Tashkentte Ortalyq Azııa qorshaǵan orta jáne klımattyń ózgerýi ýnıversıtetinde (Green University) Qazaqstan Respýblıkasy men Ózbekstan Respýblıkasy delegatsııalarynyń kezdesýi ótti, onda qorshaǵan ortany qorǵaý jáne aýa sapasyn jaqsartý salasyndaǵy ekijaqty yntymaqtastyqty damytý máseleleri talqylandy.
Qazaq delegatsııasyn Qazaqstan Respýblıkasy Ekologııa jáne tabıǵı resýrstar mınıstrliginiń Ekologııalyq retteý jáne baqylaý komıtetiniń tóraǵasy Erbolat Qojyqov basqardy. Delegatsııa quramynda Qazgıdromettiń bas dırektory Danara Álimbaeva, Túrkistan oblysynyń ekologııa departamentiniń, Saryaǵash aýdany ákimdiginiń ókilderi jáne tıisti mamandar boldy.
Kezdesý barysynda taraptar aýa sapasyn baqylaý salasyndaǵy yntymaqtastyqty damytý, ǵylymı derektermen almasý jáne transshekaralyq lastanýdy azaıtý boıynsha birlesken sharalardy júzege asyrý máselelerin talqylady. Usaq bólshekterdi (PM2.5 jáne PM10) zertteý nátıjelerine jáne atmosferalyq protsesterdiń eki eldiń shekaralas aımaqtary arasyndaǵy lastaýshy zattardyń tasymaldanýyna áserine erekshe nazar aýdaryldy.
Kelissózderden keıin Qazaqstan men Ózbekstannyń ǵylymı qaýymdastyqtarynyń qatysýymen birlesken jumys tobyn qurý týraly kelisimge qol jetkizildi. Onyń qyzmeti aýa sapasyn jaqsartý úshin keshendi zertteýler júrgizýge jáne praktıkalyq sheshimder ázirleýge baǵyttalady.
Sapar barysynda qazaqstandyq delegatsııa Ózbekstanda júzege asyrylyp jatqan ekologııalyq jobalarmen, sonyń ishinde Tashkent jylý elektr stantsııasyndaǵy zamanaýı gaz tazartý tehnologııalarymen, shyǵaryndylardy azaıtý sharalarymen jáne kólikterge ekologııalyq stıkerlerdi engizýmen tanysty.
Kezdesýden keıin taraptar seriktestikti odan ári damytýǵa degen mindettemelerin rastady jáne shekaraaralyq aýanyń lastanýyn azaıtýǵa jáne shekaralas aımaqtardaǵy ekologııalyq jaǵdaıdy jaqsartýǵa baǵyttalǵan birlesken praktıkalyq is-sharalardy únemi ótkizýge kelisti.
Aıta ketelik Qazaqstan men Ózbekstan mıneraldyq shıkizatty zertteý tájirıbesimen bólisti.
