Qazaqstan men Ózbekstan armııasy birlesken oqý-jattyǵý ótkizdi

ASTANA. QazAqparat - Ózbekstannyń áskerı delegatsııasynyń resmı sapary aıasynda Qazaqstan Respýblıkasynyń Qorǵanys mınıstri general-polkovnık Sáken Jasuzaqov pen Ózbekstan Respýblıkasy qorǵanys vedomstvosynyń basshysy general-maıor Abdýsalom Azızov «Erik dala» birlesken arnaıy taktıkalyq oqý-jattyǵýyna qatysty. Bul týraly QazAqparat QR Qorǵanys mınıstrliginiń baspasóz qyzmetine silteme jasap habarlaıdy.

Jattyǵýlar kezinde Qazaqstan men Ózbekstannyń arnaıy operatsııalyq kúshteriniń bólimsheleri túngi ýaqytta barlaý jáne jaýyngerlik operatsııalardy júrgizý boıynsha tapsyrmalardy oryndady.

«Qazaqstan men Ózbekstan Qarýly kúshteriniń arnaıy operatsııalyq kúshteri bólimshelerine júktelgen tapsyrmalar sátti orandalyp, birlesken oqý-jattyǵýdyń birinshi kezeńiniń maqsattaryna qol jetkizildi. Jattyǵýdyń ekinshi kezeńi Ózbekstan Respýblıkasynyń «Forısh» oqý ortalyǵy bazasynda josparlanǵan. Sapar barysynda kóptegen máselelerdi sheshkenimizdi atap ótkim keledi. Bizdiń Prezıdentimiz, Joǵarǵy Bas Qolbasshymyzdyń qoıǵan mindetteri aıasyndaǵy máselelerdi talqyladyq. Jedel jaýyngerlik daıarlyq pen kadrlardy daıyndaý máselelerin sheshýde tolyq túsinistik pen úılesimdilikke qol jetkizdik», - dep atap ótti QR Qorǵanys mınıstri S. Jasuzaqov.

Óz kezeginde, Ózbekstan áskerı vedomstvosynyń bastyǵy A.Azızov áriptesine jyly qabyldaǵany úshin alǵys aıtyp, turaqty kezdesýler ótkizýdiń eki armııa arasyndaǵy qarym-qatynasqa joǵary serpin beretinin atap ótti.