Qazaqstan men Ózbekstan arasyndaǵy zańsyz kóshi-qonmen kúrestiń qadamdary aıqyndaldy

NUR-SULTAN. QazAqparat – Parlament Májilisiniń jalpy otyrysynda «Qazaqstan Úkimeti men Ózbekstan Úkimeti arasyndaǵy Zańsyz kóshi-qonǵa qarsy kúrestegi yntymaqtastyq týraly kelisimdi ratıfıkatsııalaý týraly» zań jobasy maquldandy, dep habarlaıdy QazAqparat tilshisi.

Kelisimge 2019 jyly sáýirde Tashkent qalasynda eki el syrtqy ister mınıstrleri qol qoıdy. Kelisimdi ratıfıkatsııalaý kóshi aǵyndaryn retteý, azamattardyń máselelerin sheshý jáne zańsyz kóshi-qon jelilerin anyqtaý úshin qolaıly jaǵdaılar jasaıdy.

«Osy kelisim qos azamattyqqa jáne zańsyz kóshi-qonǵa qarsy kúres júrgizýde erekshe oryn alady, sondaı-aq ulttyq qaýipsizdikti qamtamasyz etýge baǵyttalǵan. Kelisimge sáıkes, Ózbekstan azamattarynyń tólqujattaryn joldaý tártibi rettelgen. Endi qandastarymyzdyń Ózbekstan elshiligine baryp, tólqujattaryn tapsyrýy jáne konsýldyq tólem tóleýi qajet emes bolady. QR Konstıtýtsııasynyń 10-baby úshinshi tarmaǵyna sáıkes, respýblıka azamatynyń basqa memlekettiń azamattyǵynda bolýy tanylmaıdy. Ózbekstan Respýblıkasy da qos azamattyqqa jol bermeıdi», - dedi QR Іshki ister mınıstriniń birinshi orynbasary Marat Qojaev.

Onyń sózine qaraǵanda, ózbek tarapy kelisimdi ratıfıkatsııalaý tártibin aıaqtady.

«Osy qujatty qabyldaý azamattyq máseleler boıynsha aqparatpen almasý, qos azamattyq jáne zańsyz kóshi-qonǵa qarsy kúreste týyndaǵan máselelerdi retteýge múmkindik beredi», - dedi mınıstrdiń birinshi orynbasary.

M. Qojaevtyń aıtýynsha, 2014 jyldan beri osyndaı 14 kelisim ázirlendi. Onyń ishinde birqataryna qol qoıyldy, ıaǵnı Qyrǵyzstanmen, Tájikstanmen, Ózbekstanmen, Belarýspen bekitildi. Sonymen qatar, bıyl Armenııamen arada tıisti qujatqa qol qoıý josparlanyp otyr.