Qazaqstan men Ózbekstan arasyndaǵy taýar aınalymy alty aıda $2,2 mlrd-qa jetti

TAShKENT. QazAqparat – Alǵashqy jartyjyldyq qorytyndysy boıynsha Qazaqstan Ózbekstannyń negizgi úsh syrtqy saýda seriktesiniń qataryna kirdi, dep habarlaıdy QazAqparattyń menshikti tilshisi.

Ózbekstan Respýblıkasy statıstıka agenttiginiń aqparaty boıynsha, 2023 jyldyń qańtar-maýsymynda eldegi syrtqy saýda aınalymy 29,2 mlrd dollarǵa jetip, byltyrǵy jyldyń osy kezeńimen salystyrǵanda 4,7 mlrd dollarǵa nemese 19,4 %-ke artqan.

Qazirgi ýaqytta Ózbekstan álemniń 183 elimen saýda-sattyq ornatqan. Eldiń negizgi saýda seriktesi – Qytaı.

Eki el arasyndaǵy aınalym $5,2 mlrd (jalpy kólemniń 18,1%-i) boldy.

Ekinshi orynda 4,4 mlrd dollarmen (15,1%) Reseı ornalasqan. Úzdik úshtikti 2,19 mlrd dollarmen (7,5%) Qazaqstan túıindedi.

Jalpy taýar aınalymy boıynsha Ózbekstan Qazaqstanǵa 699,3 mln dollarlyq taýar eksporttaǵan, al ımport 1496,2 mln dollar boldy.

Buǵan deıin 2022 jyldyń qorytyndysy boıynsha, Qazaqstan men Ózbekstannyń ekijaqty taýar aınalymy 5 mlrd dollarǵa jetkeni habarlanǵan.