Qazaqstan men Ózbekstan arasyndaǵy taýar aınalymy 35 paıyzǵa artty
«Eki el arasynda taýar aınalymy sońǵy jyldary jaqsy qarqynmen damyp kele jatyr. Atap aıtsaq, tek qana ótken jyldyń qorytyndysy boıynsha taýar aınalymy 2 mlrd AQSh dollaryn qurady. 2016 jylmen salystyrǵanda 31,2 paıyzǵa ósti. Al bıylǵy jartyjyldyqty alatyn bolsaq, 35 paıyzǵa ósip otyr», - dedi vıtse-mınıstr.
Qanat Baedilovtiń dereginshe, ımport ta, eksport ta arta túsken. Eksporttyń negizgi baǵyttary - qara metalldar, munaı ónimderi jáne bıdaı. Al ımporttyń quramyna kókónister, jemister jáne jańǵaqtar kiredi.
«Ózbekstannan Qazaqstanǵa salynǵan ınvestıtsııalar sońǵy 10 jylda 31,3 mln AQSh dollaryn qurady. Onyń tek jartysy ótken jyly ǵana salynǵan. Sońǵy 10 jylda biz Ózbekstanǵa 114,4 mln AQSh dollaryn quraıtyn ınvestıtsııa quıdyq», - dedi ol.
Aıta keterligi, vıtse-mınıstr búgin QR Parlamenti Senaty Qarjy jáne bıýdjet komıtetiniń otyrysynda «1996 jylǵy 12 maýsymdaǵy tabys pen múlikke qosarlanǵan salyqty boldyrmaý týraly Qazaqstan Úkimeti men Ózbekstan Úkimeti arasyndaǵy kelisimge ózgerister men tolyqtyrýlar engizý jónindegi eki el arasyndaǵy hattamany ratıfıkatsııalaý týraly» QR zańynyń jobasyn tanystyrǵan bolatyn. Onyń sózine qaraǵanda, zań jobasy arqyly atalǵan kelisimge birqatar ózgertý engizilmek. Máselen, keri qyzmetter boıynsha turaqty mekemeler qurý tártibi ózgeredi. Atap aıtqanda, tabıǵı resýrstardy barlaýmen baılanysty qyzmet, qoımalar, ózge de taýarlardy satý oryndaryn uıymdastyrý qarastyrylady.
Sondaı-aq, jarnalar jınaý jáne táýekelderdi saqtandyrý boıynsha saqtandyrý uıymynyń qyzmetterin júzege asyrý úshin endi birinshi kúnnen bastap mekeme qurylady. Dıvıdendter boıynsha jeńildikti stavkany qoldanýǵa shekteýler kózdeledi. Hattamany ratıfıkatsııalaý qosymsha qarajatty talap etpeıdi.
Otyrysta komıtet músheleri zań jobasyna kelisim berip, Senattyń jalpy otyrysyna shyǵarýǵa ýaǵdalasty. Jalpy otyrysta bul másele boıynsha QR Qarjy mınıstri Baqyt Sultanov baıandama jasaıtyn bolady.
