Qazaqstan men Ózbekstan arasyndaǵy taýar aınalymy $2 mlrd asty
TAShKENT - 2017 jyldyń qorytyndysy boıynsha, Qazaqstan men Ózbekstan arasyndaǵy taýar aınalymy 2 mlrd AQSh dollarynan asty. Bul týraly Qazaqstannyń Ózbekstandaǵy elshisi Erik Ótembaev QR Prezıdentiniń Joldaýyna arnalǵan konferentsııa barysynda aıtty, dep habarlaıdy QazAqparat.
«Bul rasynda da úlken kórsetkish jáne bul bizdiń 2017 jyldy nátıjeli aıaqtaǵanymyzdy bildiredi. Bizdiń elderimizdiń arasyndaǵy taýar aınalymy 30% ósti. Osyndaı jetistikterge qaramastan biz jaqyn arada taýar aınalymyn 5 mlrd AQSh dollaryna jetkizýdi kózdep otyrmyz. Bul rette biz túrli salalar boıynsha yntymaqtastyqty arttyrýǵa baǵyttalǵan naqty máselelerdi talqyladyq»,-dep atap kórsetti Erik Ótembaev.
Sonymen qatar, shara barysynda qazaqstandyq dıplomat qonaqtardyń nazaryn eki el arasyndaǵy yntymaqtastyqty munaı hımııasy men agrosektorda damytýdyń mańyzdylyǵyna aýdardy.
«Biz sondaı-aq munaı hımııasy men hımııa klasterin damytý máselelerin talqyǵa saldyq. Bul máseleler jańa kásiporyndardyń jumysyna serpin beredi. Sondaı-aq birqatar máseleler agrosektordy damytýmen baılanysty boldy. QR Prezıdenti óziniń Joldaýynda agrosektordaǵy ónimdilikti arttyrý men eksporttyq áleýetti arttyrý máselesin kótergen bolatyn. Bul rette Ózbekstan men Qazaqstan jaqsy úlgi bolyp otyr. Bizde qazir agroındýstrıaldy salany nyǵaıtý men jańa tehnologııalardy engizýge baǵyttalǵan birqatar jobalar bar»,-dedi E.Ótembaev.
Qazaqstandyq dıplomat mashına qurylysy salasyndaǵy birlesken jetistikter týraly erekshe aıtyp ótti. Onyń sózinshe, Qazaqstanda «Ravon» kólikterin shyǵaratyn zaýyt osy jetistikterdiń jarqyn dáleli.
«Bul baǵytta biz úlken serpilis jasap otyrmyz, ıaǵnı biz mashına qurylysy salasyndaǵy máselelerdi sheship, avtomobıl óndirisin damyta bastadyq. Osylaısha, Qostanaıda, Ózbekstan ókilderimen birlesip, «Ravon» kólikterin shyǵarýdamyz. Bıyl osy kólikterdiń sanyn jylyna 7 myńǵa jetkizýdi kózdep otyrmyz»,-dep túıindedi ol.
