Qazaqstan men Ózbekstan arasyndaǵy taýar aınalymy 1,5 mlrd dollardy qurady
TAShKENT. QazAqparat - Ústimizdegi jyldyń tórt aıynyń qorytyndysy boıynsha Qazaqstan Ózbekstannyń negizgi syrtqy saýda áriptesteriniń úshtigine endi, dep habarlaıdy QazAqparat tilshisi.
Ózbekstan Respýblıkasy Memlekettik statıstıka komıtetiniń málimetinshe, 2023 jyldyń qańtar-sáýir aılarynda eldegi syrtqy saýda aınalym 19,6 mıllıard dollardy qurap, ótken jyldyń sáıkes kezeńimen salystyrǵanda 2,3 mıllıard dollarǵa nemese 13,4 paıyzǵa ósken.
Syrtqy saýda aınalymynyń eń úlken kólemi Qytaımen – 3,3 mlrd dollar (jalpy kólemniń 17%), Reseı – 2,9 mlrd dollar (15,1%), Qazaqstan – 1,5 mlrd dollar (7,7%), Túrkııa – 1 mlrd dollar (5,4%) jáne Koreıa Respýblıkasy – $0,8 mlrd (4,1%).
Jalpy taýar aınalymy qurylymynda Ózbekstan Qazaqstanǵa 426,8 mıllıon dollarǵa taýar eksporttasa, ımport 1080 mıllıon dollardy qurady.
Buǵan deıin habarlaǵanymyzdaı, 2022 jyldyń sońyna qaraı Qazaqstan men Ózbekstan arasyndaǵy ekijaqty taýar aınalymy 5 mıllıard dollarǵa jetken.
Mádıbek Jánibekov
