Qazaqstan men Ózbekstan arasyndaǵy áýe reısterdiń sany artady
ASTANA. QazAqparat - Qazaqstan men Ózbekstan arasyndaǵy avıareısterdiń sany artatyn boldy, dep habarlaıdy QazAqparat tilshisi QR Investıtsııalar jáne damý mınıstrliginiń Feısbýktegi paraqshasyna silteme jasap.
Astanada Qazaqstan men Ózbekstan avıatsııalyq bılik organdarynyń resmı kelissózderi ótti. QR IDM Azamattyq avıatsııa komıtetiniń tóraǵasy Talǵat Lastaev Ózbekstan Respýblıkasynyń Ushý qaýipsizdigin qadaǵalaý memlekettik ınspektsııasy bastyǵynyń orynbasary Oleg Lım bastaǵan ózbek eliniń delegatsııasymen kezdesti.
«Kelissózder qorytyndysy boıynsha ár tarap úshin Astana-Tashkent baǵytyndaǵy reıster sanyn aptasyna 4-ten 6-ǵa deıin jáne Almaty-Tashkent baǵytynda aptasyna 7-den 10 reıske deıin arttyrý týraly ýaǵdalastyqqa qol jetkizildi. Bul kelisim eki eldiń bekitilgen áýe kompanııalaryna aptasyna 32 reısti oryndaýǵa múmkindik beredi», - delingen habarlamada.
Sondaı-aq, taraptar bekitilgen áýe kompanııalar arasynda ózara tıimdi sharttarmen «sher-kod» kommertsııalyq kelisimge qol qoıýǵa kelisti.
Kezdesýde qol jetkizilgen ýaǵdalastyqtar týrızm men saýda-ekonomıkalyq baılanystardy damytýǵa yqpal etedi jáne eki el arasyndaǵy yntymaqtastyq deńgeıin arttyrady.
