Qazaqstan men Ózbekstan arasynda ushaqtar jıi qatynaıtyn boldy
ASTANA. QazAqparat - Qazaqstan men Ózbekstan avıatsııalyq bılik organdarynyń qol jetkizgen kelisimderi nátıjesinde eki el arasyndaǵy áýe reısteriniń jıiligi artatyn boldy, dep habarlaıdy QazAqparat tilshisi.
QR IIDM Azamattyq avıatsııa komıtetinen habarlaǵandaı, halyqaralyq áýe tasymalyn damytý boıynsha turaqty jumys jalǵasyp jatyr.
«Máselen, 2019 jylǵy kóktem-jaz navıgatsııasy bastala salysymen «Eır Astana» jáne «O'zbekiston Havo Yo'llari» áýe kompanııalarynyń árqaısysy Almaty men Tashkent baǵytyndaǵy reısterdi aptasyna 7-den 10-ǵa deıin jáne Astana-Tashkent baǵytyndaǵy reısterdi aptasyna 4-ten 6-ǵa deıin kóbeıtedi. Osylaısha, Qazaqstan men Ózbekstan arasyndaǵy áýe reısteriniń jalpy sany aptasyna 22-den 32 reıske deıin artty. Reısetr E190 jáne A320 tıpti ushaqtarmen oryndalady», - dep habarlady komıtetten.
Áýe reısteriniń kóbeıýi baýyrlas elder arasyndaǵy qarym-qatynasty odan ári nyǵaıtýǵa, sondaı-aq Ózbekstandaǵy Qazaqstan jylyn tabysty ótkizýge múmkindik bermek.
