Qazaqstan men Ózbekstan arasynda Maqtaaral stansasy iske qosylady
ASTANA. QazAqparat - Búgin Parlament Senaty Halyqaralyq qatynastar, qorǵanys jáne qaýipsizdik komıtetiniń keńeıtilgen otyrysynda «2006 jylǵy 4 qyrkúıektegi Qazaqstan Respýblıkasynyń Úkimeti men Ózbekstan Respýblıkasynyń Úkimeti arasyndaǵy Qazaqstan-Ózbekstan memlekettik shekarasy arqyly ótkizý pýnktteri týraly kelisimge hattamaǵa ózgerister men tolyqtyrýlar engizý týraly hattamany ratıfıkatsııalaý týraly» zań jobasy talqylandy.
Hattamanyń negizgi maqsaty eki eldiń ótkizý pýnktterine Maqtaaral stansasyn engizý bolyp tabylady. Osynyń arqasynda qazaqstandyq júkterdi Shardara sý qoımasy aýmaǵynan Ózbekstannyń tranzıttik temirjol ýchaskesin paıdalana otyryp, ótkizip shyǵarý qarastyrylady. Aıta keterligi, buǵan deıin Maqtaaral stansasy bekitilgen tizbede bolmaǵandyqtan Ózbekstan tarapy osy baǵyttaǵy Qazaqstannyń poıyzdaryn ótkizbeı kelgen. Endi bul másele eki el arasyndaǵy hattama arqyly tolyǵymen sheshimin tappaq.
Aıta keterligi, hattamada sondaı-aq, Keden odaǵynyń standarttaryna sáıkes kelmeıtin avtomobılder ótkizý pýnktteriniń sanyn 10-nan 6-ǵa deıin qysqartý kózdeledi.
Zań jobasy palatanyń aldaǵy jalpy otyrysyna shyǵarylady.
