Qazaqstan men Ózbekstan arasynda eńbekshi mıgranttardyń quqyqtaryn qorǵaý tártibi aıqyndaldy
NUR-SULTAN. QazAqparat - Parlament Májilisiniń jalpy otyrysynda «Qazaqstan Úkimeti men Ózbekstan Úkimeti arasyndaǵy eńbekshi mıgranttardyń eńbek qyzmeti jáne olardyń quqyqtaryn qorǵaý týraly kelisimdi ratıfıkatsııalaý týraly» zań jobasy maquldandy, dep habarlaıdy QazAqparat tilshisi.
Kelisimge 2019 jyldyń sáýirinde QR Prezıdenti Qasym-Jomart Toqaevtyń Ózbekstanǵa jasaǵan memlekettik sapary aıasynda Tashkentte qol qoıylǵan bolatyn. Qujattyń maqsaty – taraptar memleketterinde kóshi-qon aǵyndaryn retteý men zańsyz eńbek qyzmetin boldyrmaý jóninde sharalardy júzege asyrý.
«Kelisimdi ratıfıkatsııalaý eki eldiń arasyndaǵy eńbek kóshi-qon protsesterin retteýde yntymaqtastyqtyń nyǵaıýyna yqpal etedi dep senemiz. Ratıfıkatsııa basqa normatıvtik-quqyqtyq aktilerdi qabyldaý nemese olarǵa ózgerister engizýdi talap etpeıdi. Kelisimniń kúshi eki el arasyndaǵy barlyq eńbekshi kóship-qonýshylarǵa qoldanylady jáne olardyń qyzmeti men quqyqtaryn qorǵaý máselesin retteıdi», - dedi QR Eńbek jáne halyqty áleýmettik qorǵaý mınıstri Birjan Nurymbetov.
Sonymen qatar, kelisimde ókiletti memlekettik organdar belgilengen. Qujatta ózara qatynastar boıynsha ulttyq zańnamanyń basymdyǵy rettelgen jáne qyzmetkerlerdiń, jumysshylardyń bazalyq kepildikteri bekitilgen. Ýaǵdalastyqtarǵa sáıkes, eńbekshi mıgranttar qabyldaýshy memlekettiń zańdary men eńbek shartynyń talaptaryna sáıkes demalýǵa, aınalasyndaǵy adamdar úshin qaýip tóndiretin aýrýlar kezinde tegin medıtsınalyq kómektiń kepildendirilgen kólemin alýǵa quqyly.
