Qazaqstan men Ózbekstan arasyndaǵy jabyq turǵan iri shekara beketi qashan ashylady

ASTANA. KAZINFORM – Qazaqstan men Ózbekstan arasyndaǵy eń iri shekara ótkelderiniń biri — «Jibek joly – Gısht Kýprık» beketi 2025 jyldyń aqpan aıynan beri jabyq tur. Qaıta qurý jumystary jalǵasyp jatqandyqtan, onyń ashylýy jaqyn arada josparlanbaı otyr.

Memlekettik kirister komıtetiniń málimetinshe, Qazaqstan aýmaǵyndaǵy qurylys jumystary 2025 jyldyń aqpanynda bastalyp, 2026 jyldyń tamyzyna deıin jalǵasady.

— «Jibek joly» shekara beketin qaıta jańartý jumystary 2025 jyldyń aqpan aıynda bastaldy. Jobalyq-smetalyq qujattamaǵa sáıkes, qurylys 2026 jyldyń tamyzynda aıaqtalady, — dep naqtylady vedomstvo.

Ózbekstandaǵy irgeles «Gısht Kýprık» beketinde de jańǵyrtý jumystary júrip jatyr. Alǵashynda olardy tórt aı ishinde aıaqtaý josparlanǵanymen, merzim keıinge shegerildi.

— Ózbekstan tarapyndaǵy rekonstrýktsııa jumystary áli aıaqtalǵan joq. Resmı málimet boıynsha, «Gısht Kýprık» beketi 2025 jyldyń tórtinshi toqsanynda qaıta ashylady, — dedi komıtet ókilderi.

Osy kezeńde «Jibek joly» beketi arqyly jaıaý júrginshiler men kólik qozǵalysy tolyǵymen toqtatylǵan.

• Azamattar men júk tasymaldaýshylar úshin balama baǵyttar usynyldy. Jaıaý shekara asý úshin «Qapylanbek», «B. Qonysbaeva», «Syrdarııa» jáne «Tselınnyı» beketteri paıdalanylady.
• Júk tasymaly «B. Qonysbaeva», «Atameken» jáne «Qazyǵurt» beketteri arqyly júzege asyrylady.
• Temirjol qatynasy úshin «Saryaǵash» jáne «Beıneý» beketteri qoljetimdi.

Sonymen qatar, «Dáýit ata» men «Tájen» shekara beketteri 1 qyrkúıekke deıin jabyq bolady. Bul sheshim qos eldiń kelisimimen qabyldanǵan jáne jalǵasyp jatqan qurylys jumystaryna baılanysty engizildi.

Aıta keteıikǵ shildeniń basynda BQO-da «Syrym» avtomobıl ótkizý beketinde qurylys-montaj jumystary bastalady.