Qazaqstan men Ózbekstan arasyndaǵy temirjol tasymaly eki ese artady
ASTANA. KAZINFORM – Qazaqstan men Ózbekstan temirjol tasymalyn eki esege arttyrý maqsatynda shekaralyq toraptardyń jumysyn úılestiredi. Bul týraly Kólik mınıstrligi habarlady.
Qazaqstan men Ózbekstannyń birlesken delegatsııasy negizgi shekara mańyndaǵy temirjol nysandaryna jumys saparymen bardy.
Іs-shara eki eldiń kólik mınıstrlikteri arasynda tasymal kólemin 60 mln tonnaǵa deıin ulǵaıtý jónindegi ýaǵdalastyqtardy iske asyrý aıasynda ótti.
Delegatsııa quramyna temirjol ákimshilikteriniń basshylary, Shekara qyzmetiniń, Memlekettik kirister komıtetiniń ókilderi, sondaı-aq fıtosanıtarlyq jáne veterınarlyq baqylaýǵa jaýapty Aýyl sharýashylyǵy mınıstrliginiń mamandary kirdi.
Delegatsııa Saryaǵash jáne Syrdarııa memleketaralyq túıispelerin jan-jaqty tekserdi. Atalǵan nysandar eki el arasyndaǵy ótkizý qabiletin keńeıtýdiń negizgi pýnktterine aınalady. Bul óz kezeginde júk tasymaly kólemin eki esege arttyrýǵa múmkindik beredi.
Іs-shara barysynda temirjol tasymalynyń ótkizý qabileti men tıimdiligine áser etetin ınfraqurylymdyq shekteýlerdi joıý máseleleri qaraldy.
Sapar aıasynda taraptar memleketaralyq túıispelerdiń ótkizý qabiletin josparly túrde keńeıtýdiń basymdyǵyn rastady.
Atap aıtqanda, Saryaǵash túıispesinde ótkizý qabiletin táýligine 36 jup poıyzdan 40 jup poıyzǵa deıin arttyrý, al «Oazıs» túıispesinde kórsetkishti bes esege — táýligine 10 jup poıyzǵa deıin ulǵaıtý josparlanyp otyr.
Sondaı-aq Darbaza – Maqtaaral strategııalyq temirjol ýchaskesi paıdalanýǵa berilgennen keıin Syrdarııa túıispesiniń ótkizý qabileti de táýligine 10 jup poıyzǵa deıin jetkiziledi. Bul 60 mln tonna kólemindegi maqsatty júk aınalymyna qol jetkizý úshin qajetti tehnıkalyq negizdi qamtamasyz etedi.
Aıta ketelik Ózbekstanda qazaqstandyq kapıtalmen jumys isteıtin kompanııalar qatary kóbeıdi.