Qazaqstan men Ózbekstan arasyndaǵy taýar aınalymyn 10 mlrd dollarǵa jetkizý josparlanyp otyr — Mádı Takıev
ASTANA. KAZINFORM — Quryltaı otyrysynan keıin ótken brıfıngte Qarjy mınıstri Mádı Takıev Qazaqstan men Ózbekstan arasyndaǵy taýar aınalymyn arttyrý josparlary týraly málimdedi.
— Ózbekstanmen taýar aınalymymyz belsendi. Ótken jyldyń qorytyndysy boıynsha bul kórsetkish 4,7 mlrd dollarǵa jetti. Bıylǵy jyldyń 9 aıynda taýar aınalymy 3,7 mlrd dollar bolyp, 29%-ǵa ósti. Alaıda aldaǵy ýaqytta ony 10 mlrd dollarǵa deıin jetkizý mindeti tur, — dedi ol.
Mınıstr, sondaı-aq, osy maqsatqa jetý úshin eki eldiń keden qyzmetteriniń ókildikterin ashý týraly kelisimge qol qoıylǵanyn atap ótti.
— Bul ókildikter otandyq jáne sheteldik kásipkerlerge praktıkalyq ári teorııalyq kómek kórsetip, taýar aınalymyn arttyrýǵa yqpal etedi. Mysaly, taýarlardyń shekarada turyp qalmaýyn qamtamasyz etý jáne basqa da máselelerdi Ózbekstandaǵy áriptesterimizben birlesip sheshý kózdelip otyr, — dep túsindirdi ol.
Aıta keteıik, buǵan deıin Qazaqstan men Ózbekstannyń shekarasyndaǵy ótkizý beketterinde qandaı ózgeris bolatynyn jazǵanbyz.
