Qazaqstan men Ózbekstan arasyndaǵy taýar aınalymy artyp keledi
TAShKENT. KAZINFORM – Qańtar-sáýir aılarynyń qorytyndysy boıynsha Qazaqstan Ózbekstannyń negizgi saýda seriktesteriniń úshtiginde qaldy, dep habarlaıdy Kazinform agenttiginiń Tashkenttegi menshikti tilshisi.
Ózbekstan Ulttyq statıstıka komıtetiniń aqparatyna saı, 4 aıda eldiń syrtqy saýda aınalymy 26,3 mlrd dollarǵa teńelip, 2025 jyldyń sáıkes kezeńimen salystyrǵanda 5,8%-ǵa ósti. Qańtar-sáýirde kórshiles memleket álemniń 175 elimen saýda-sattyq jasady.
Ózbekstannyń negizgi saýda seriktesteri kóshin Qytaı bastap tur. Eki memleket arasyndaǵy taýar aınalymy 6,2 mlrd dollardan (jalpy kólemniń 23,6%) asty.
Al saýda-sattyqtyń 17,2%-y Reseıdiń úlesine tıesili. Bul elmen aradaǵy eksport-ımport kólemi 4,5 mlrd dollardan artyq.
Sondaı-aq kóshbasshylardyń úshtigin Qazaqstan túıindeıdi. Resmı Astana men Tashkent arasyndaǵy taýar aınalymy 1,8 mlrd dollardan (6,9%) asty. Bul 2025 jyldyń sáıkes kezeńimen salystyrǵanda 414 mln dollarǵa kóp. Qamtylyp otyrǵan kezeńde Ózbekstan 425,5 mln dollardyń taýaryn eksporttap, 1,3 mlrd dollardan astam somaǵa ónim ımporttaǵan.
Eske salaıyq, bıyl úsh aıda qazaqstandyq kásipkerler Ózbekstanda 40-qa jýyq kompanııa qurǵan.
Buǵan deıin habarlaǵanymyzdaı, bıyl tórt aıda 935 myńnan astam qazaqstandyq demalysyn Ózbekstanda ótkizgen.
