Qazaqstan men Ózbekstan arasyndaǵy taýar aınalymy $3,25 mlrd-qa jetti
ASTANA. KAZINFORM – Astanada Premer-mınıstr orynbasary – Ulttyq ekonomıka mınıstri Serik Jumanǵarın men Ózbekstan Respýblıkasy Premer-mınıstriniń orynbasary Jamshıd Hodjaev ekijaqty kezdesý ótkizdi. Jıynda taraptar saýda-ekonomıkalyq yntymaqtastyqty damytý, ózara saýdanyń ósýi jáne Qazaqstan men Ózbekstan arasyndaǵy Jol kartasyn júzege asyrý máselelerin talqylady. Bul týraly Úkimettiń baspasóz qyzmeti habarlady.
Kezdesýdi ashqan Serik Jumanǵarın eki memleket basshylary arasyndaǵy ýaǵdalastyqtardy júzege asyrý baǵytyndaǵy syndarly ustanymy men júıeli jumystary úshin Ózbekstan Úkimetine alǵysyn bildirdi.
– Ózbekstan Prezıdenti Shavkat Mırzıeevtiń Astanaǵa sapary jáne Úkimetaralyq komıssııanyń 23-shi otyrysy bizdiń strategııalyq áriptestigimizdiń berik negizin aıqyndady. Búginde bizde naqty ýaǵdalastyqtar men birlesken jumys júrgizilip jatqan Jol kartasy bar, - dep atap ótti Qazaqstan Premer-mınıstriniń orynbasary.
Eki eldiń saýda-ekonomıkalyq baılanysy ósip keledi. 2026 jylǵy jeti aıdyń qorytyndysy boıynsha Qazaqstan men Ózbekstan arasyndaǵy taýar aınalymy ótken jylǵy sáıkes kezeńmen salystyrǵanda 29,8%-ǵa artyp, $3,25 mlrd-qa jetti.
Eki el aldynda $10 mlrd-tyq taýar aınalymyna shyǵý mindeti tur. Osy maqsatqa jetý úshin ózara saýdany dáıekti túrde keńeıtý jáne birlesken jobalardy júzege asyrýdy jedeldetý mańyzdy.
Ózbekstan Premer-mınıstriniń orynbasary Jamshıd Hodjaev óz kezeginde eki el arasyndaǵy qarym-qatynastar damýynyń oń dınamıkasyn atap ótti. Ol Qazaqstan Ózbekstan úshin baýyrlas el ári senimdi áriptes ekenin atap ótti. Taraptar ózara saýda men ınvestıtsııany dáıekti túrde arttyrýda, kólik tasymaly kólemin ulǵaıtyp jatyr. Ózbekstan Qazaqstanmen keń aýqymdy baǵyttar boıynsha yntymaqtastyqty odan ári damytýǵa múddeli.
Jıyn sońynda taraptar saýda-ekonomıkalyq ózara is-qımyldy keńeıtý, birlesken ınvestıtsııalyq jobalardy ilgeriletý jáne qol jetkizilgen ýaǵdalastyqtardy júzege asyrý jónindegi jumysty jalǵastyrýǵa ýaǵdalasty.
Aıta keteıik, 2030 jylǵa qaraı Ózbekstan týrızmniń JІÓ-degi úlesin 7%-ǵa deıin jetkizýdi, týrızm qyzmetteri eksportyn 8 mıllıard dollardan asyrýdy jáne joǵary deńgeıli qonaq úıler sanyn eki ese arttyrýdy josparlap otyr.
