Qazaqstan men Ózbekstan arasyndaǵy taýar aınalymy 3 mlrd dollardan asty

TAShKENT. KAZINFORM – Bıylǵy 8 aıdyń qorytyndysy boıynsha Qazaqstan Ózbekstannyń negizgi saýda seriktesteriniń úshtiginde qaldy, dep habarlaıdy Kazinform agenttiginiń menshikti tilshisi.

Ózbekstan Ulttyq statıstıka komıtetiniń aqparatyna saı, qańtar-tamyz aralyǵynda eldiń syrtqy saýda aınalymy 51,4 mlrd dollarǵa jetip, byltyrǵy kezeńmen salystyrǵanda 19,8%-ǵa ósti. Búgingi tańda kórshiles memleket álemniń 200 elimen saýda-sattyq jasaıdy.

Ózbekstannyń negizgi saýda seriktesteri kóshin Qytaı bastap tur. Eki memleket arasyndaǵy taýar aınalymy 9,7 mlrd dollardan (jalpy kólemniń 18,9%) asty.

Al saýda-sattyqtyń 16,1% Reseıdiń úlesine tıesili. Bul elmen aradaǵy eksport-ımport kólemi 8,3 mlrd dollardan asady.

Sondaı-aq, kóshbasshylardyń úshtigin Qazaqstan túıindeıdi. Resmı Astana men Tashkent arasyndaǵy taýar aınalymy 3 mlrd dollardan (5,9%) artyq. Bul ótken jyldyń sáıkes kezeńimen salystyrǵanda 605,1 mln dollarǵa kóp.

Qamtylyp otyrǵan kezeńde Ózbekstan Qazaqstanǵa 910,8 mln dollardyń taýaryn eksporttap, 2,1 mlrd dollardan astam somaǵa ónim ımporttaǵan.

Buǵan deıin habarlaǵanymyzdaı, Ózbekstanda qazaqstandyq kapıtalmen jumys isteıtin kompanııalar qatary kóbeıdi. Atap aıtqanda, jarty jyldyń ishinde bizdiń el Ózbekstanda 116 kásiporyn ashty. Osylaısha, qazir resmı Tashkentte qazaqstandyq kapıtalmen jumys isteıtin kompanııalar sany 1 157-ge teńeldi.

Qosa ketsek, Qazaqstan men Ózbekstan arasynda qosymsha 4 saýda dálizi ashylýy múmkin. Sondaı-aq, Tashkentte Qazaqstannyń, Astanada Ózbekstannyń saýda ortalyǵy salynýy yqtımal.