Qazaqstan men Ózbekstan arasyndaǵy taýar aınalymy 2,7 mlrd dollardan asty
TAShKENT. KAZINFORM — Qańtar-maýsym aılarynyń qorytyndysy boıynsha Qazaqstan Ózbekstannyń negizgi saýda seriktesteriniń úshtiginde qaldy, dep habarlaıdy Kazinform agenttiginiń Tashkenttegi menshikti tilshisi.
Ózbekstan Ulttyq statıstıka komıtetiniń aqparatyna saı, alty aıda eldiń syrtqy saýda aınalymy 41 mlrd dollarǵa teńelip, 2025 jyldyń sáıkes kezeńimen salystyrǵanda 7,4%-ǵa ósti. Qańtar-maýsymda kórshiles memleket álemniń 195 elimen saýda-sattyq jasady.
Ózbekstannyń negizgi saýda seriktesteri kóshin Qytaı bastap tur. Eki memleket arasyndaǵy taýar aınalymy 9,4 mlrd dollardan (jalpy kólemniń 23,1%) asty.
Al saýda-sattyqtyń 17,1%-y Reseıdiń úlesine tıesili. Bul elmen aradaǵy eksport-ımport kólemi 7 mlrd dollardan artyq.
Sondaı-aq kóshbasshylardyń úshtigin Qazaqstan túıindeıdi. Resmı Astana men Tashkent arasyndaǵy taýar aınalymy 2,7 mlrd dollardan (6,8%) asty. Bul 2025 jyldyń sáıkes kezeńimen salystyrǵanda 572 mln dollarǵa kóp. Qamtylyp otyrǵan kezeńde Ózbekstan 717 mln dollardyń taýaryn eksporttap, 2 mlrd dollardan astam somaǵa ónim ımporttaǵan.
Eske salaıyq, bıyl 5 aıda Qazaqstan men Ózbekstan arasyndaǵy taýar aınalymy 2,2 mlrd dollardan asqan edi.
Buǵan deıin habarlaǵanymyzdaı, jarty jylda 4,5 myńnan astam qazaqstandyq Ózbekstanǵa emdelý úshin barǵan.
Sondaı-aq, alty aıda 1,5 mıllıonnan astam qazaqstandyq Ózbekstanǵa saıahattap barǵan.
