Qazaqstan men Ózbekstan arasyndaǵy taýar aınalymy 1,4 mlrd dollarǵa jýyqtady

TAShKENT. KAZINFORM – Qańtar-sáýir aılarynyń qorytyndysy boıynsha Qazaqstan Ózbekstannyń negizgi saýda seriktesteriniń úshtiginde qaldy, dep habarlaıdy Kazinform agenttiginiń menshikti tilshisi.

Ózbekstan Ulttyq statıstıka komıtetiniń aqparatyna saı, qańtar-sáýir aralyǵynda eldiń syrtqy saýda aınalymy 24,6 mlrd dollarǵa jetip, byltyrǵy kezeńmen salystyrǵanda 16,3%-ǵa ósti. Búgingi tańda kórshiles memleket álemniń 183 elimen saýda-sattyq jasaıdy.

Eldiń negizgi saýda seriktesteri kóshin Qytaı bastap tur. Eki memleket arasyndaǵy taýar aınalymy 4,1 mlrd dollardan (jalpy kólemniń 17%) asty.

Odan keıingi orynda saýda-sattyqtyń 15,1% úlesi tıesili Reseı tur. Bul elmen aradaǵy ımport-eksport kólemi 3,7 mlrd dollardan artyq.

Sonymen qatar, kóshbasshylardyń úshtigin Qazaqstan túıindeıdi. Bizdiń el men Ózbekstan arasyndaǵy taýar aınalymy 1,4 mlrd dollarǵa (5%) jýyqtaıdy. Bul ótken jyldyń sáıkes kezeńimen salystyrǵanda 168 mln dollarǵa kóp.

Qamtylyp otyrǵan kezeńde Ózbekstan Qazaqstanǵa 405,7 mln dollardyń taýaryn eksporttap, 986,8 mln dollardan astam somaǵa taýar ımporttaǵan.

Eske salaıyq, resmı Astana men Tashkent ózara taýar aınalymyn 10 mlrd dollarǵa jetkizýge múddeli. Atalǵan kórsetkishke qol jetkizý úshin Qazaqstan men Ózbekstan arasynda qosymsha 4 saýda dálizi ashylýy múmkin.

Qosa ketsek, byltyr Qazaqstan men Ózbekstan arasyndaǵy ózara taýar aınalymy 4,2 mlrd dollardan asty.