Qazaqstan men Ózbekstan arasyndaǵy taýar aınalymy 1,3 mlrd dollarǵa jetti
TAShKENT. KAZINFORM – Qańtar-naýryz aılarynyń qorytyndysy boıynsha Qazaqstan Ózbekstannyń negizgi saýda seriktesteriniń úshtiginde qaldy, dep habarlaıdy Kazinform agenttiginiń Tashkenttegi menshikti tilshisi.
Ózbekstan Ulttyq statıstıka komıtetiniń aqparatyna saı, alǵashqy toqsanda eldiń syrtqy saýda aınalymy 18 mlrd dollarǵa teńelip, 2025 jyldyń sáıkes kezeńimen salystyrǵanda 2,7%-ǵa ósti. Qańtar-naýryzda kórshiles memleket álemniń 170 elimen saýda-sattyq jasady.
Ózbekstannyń negizgi saýda seriktesteri kóshin Qytaı bastap tur. Eki memleket arasyndaǵy taýar aınalymy 4,6 mlrd dollardan (jalpy kólemniń 25,6%) asty.
Al saýda-sattyqtyń 18,2%-y Reseıdiń úlesine tıesili. Bul elmen aradaǵy eksport-ımport kólemi 3,2 mlrd dollardan artyq.
Sondaı-aq kóshbasshylardyń úshtigin Qazaqstan túıindeıdi. Resmı Astana men Tashkent arasyndaǵy taýar aınalymy 1,3 mlrd dollardan (7,2%) asty. Bul 2025 jyldyń sáıkes kezeńimen salystyrǵanda 280 mln dollarǵa kóp. Qamtylyp otyrǵan kezeńde Ózbekstan 282,2 mln dollardyń taýaryn eksporttap, 1 mlrd dollardan astam somaǵa ónim ımporttaǵan.
Buǵan deıin habarlaǵanymyzdaı, alǵashqy úsh aıda 680 myńnan astam qazaqstandyq Ózbekstanǵa saıahattap barǵan.
Qosa ketsek, taıaýda Samarqandta Azııa damý banki Basqarýshylar keńesiniń 59-shy otyrysynda sóz sóılegen kórshiles eldiń prezıdenti Shavkat Mırzıeev jahandyq qaqtyǵystar OA elderi úshin júk tasymaly qunynyń 30%-ǵa deıin ósýine sebep bolyp jatqanyn aıtqan edi.
