Qazaqstan men Ózbekstan arasyndaǵy reıster kóbeıedi: Tashkentke aptasyna 60 reıske deıin ushady
ASTANA. KAZINFORM — Qazaqstan men Ózbekstan Almaty – Tashkent jáne Astana – Tashkent baǵyttaryndaǵy reıster sanyn aptasyna 60-qa deıin arttyrýǵa kelisti. Basqa baǵyttardaǵy reıster sany da 14-ten 20-ǵa deıin kóbeıedi. Bul týraly Kólik mınıstrligi málim etti.
Tashkent qalasynda «Qytaı – Ortalyq Azııa» (C5+1) azamattyq avıatsııa salasyndaǵy yntymaqtastyq jónindegi jumys toby konferentsııasy aıasynda Qazaqstan men Ózbekstannyń avıatsııalyq bılik ókilderi arasynda ekijaqty kelissózder ótti.
Qazaqstan delegatsııasyn QR Kólik mınıstrligi Azamattyq avıatsııa komıtetiniń tóraǵasy Saltanat Tompıeva basqardy. Ózbekstan tarapynan kelissózderge Ózbekstan Respýblıkasy Kólik mınıstrliginiń Áýe kóligi basqarmasynyń basshysy Djamolıddın Nazarov qatysty.
Kelissózder barysynda taraptar áýe qatynasyn odan ári keńeıtý, turaqty reısterdiń jıiligin arttyrý jáne eki eldiń iri qalalary arasyndaǵy áýe tasymalynyń qoljetimdiligin jaqsartý máselelerin talqylady.
Almaty – Tashkent jáne Astana – Tashkent baǵyttarynyń árqaısysy boıynsha aptasyna ruqsat etilgen reıster sanyn 60-qa deıin arttyrý týraly kelisimge qol jetkizildi.
Sondaı-aq taraptar Qazaqstan men Ózbekstan arasyndaǵy basqa baǵyttar boıynsha ruqsat etilgen reıster sanyn aptasyna 14-ten 20 reıske deıin ulǵaıtýǵa kelisti.
Qol jetkizilgen ýaǵdalastyqtardy iske asyrý suranys joǵary baǵyttar boıynsha áýe tasymaly usynysyn arttyrýǵa múmkindik beredi.
Qazaqstan men Ózbekstan arasyndaǵy jolaýshylar aǵynynyń ósýi, iskerlik jáne týrıstik baılanystardyń jandanýy áýe tasymalyna degen suranystyń artýyna yqpal etip, eki el arasyndaǵy kólik qatynasyn nyǵaıtýǵa qosymsha múmkindikter ashady.
Aıta keteıik, buǵan deıin Qazaqstan men Oman arasynda tikeleı áýe qatynasy ashylǵanyn jazdyq.
