Qazaqstan men Ózbekstan arasynda jol qysqartatyn jańa áýe baǵyty ashyldy

TAShKENT. KAZINFORM – Áýe qatynasyn ońtaılandyrý maqsatynda 11 shildeden bastap Ózbekstan men Qazaqstan arasynda reıs oryndaıtyn ushaqtar úshin «T-916» dep atalatyn jańa navıgatsııalyq baǵyt ashyldy, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

«Ózaeronavıgatsııa» ortalyǵynyń málimetine saı, jańa marshrýt ashylǵan kúni ol arqyly alǵash bolyp nemistiń «Lufthansa» áýekompanııasynyń ushaǵy reıs oryndady.

«Bul marshrýtty qoldaný esebinen qashyqtyq 40 shaqyrymǵa qysqarady jáne jylyna 30-50 tonna avıaotyn únemdeýge bolady. Bul rette, otteginiń shyǵyny 50-70 tonnaǵa kemıdi, al atmosferaǵa bólinetin zııandy shyǵaryndylardyń kólemi jylyna 220-250 tonnaǵa azaıady», - delingen «Ózaeronavıgatsııa» ortalyǵynyń habarlamasynda.

Aıta keteıik, atalǵan navıgatsııalyq baǵytty ashý týraly kelisim «Ózaeronavıgatsııa» jáne «Qazaeronavıgatsııa» kásiporyndary arasynda jasalǵan.