Qazaqstan men Ózbekstan arasynda nege taýar aınalymy azaıyp barady – Saýda mınıstriniń jaýaby
ASTANA. KAZINFORM – Májilis depýtaty Ashat Rahymjanov Qazaqstan men Ózbekstan arasyndaǵy taýar aınalymynyń kólemi azaıyp bar jatqanyna alańdaýshylyq bildirdi.
- Keıingi jyldary Qazaqstan men Ózbekstan arasyndaǵy taýar aınalymynyń tómendeýi baıqalyp otyr. 2022 jyly 5 mıllıard dollar bolsa, 2023 jyly 4 mıllıard dollardan sál asqan. Dál osyndaı úrdis 2024 jyly baıqaldy. Al eki memlekettiń basshylary taýar aınalymyn 10 mlrd dollarǵa deıin ulǵaıtý maqsatyn qoıǵan edi. Bul - óte órshil ári qıyn mindet. Aradaǵy taýar aınalymynyń tómendeýine ne áser etti, - dep surady depýtat.
Mınıstrdiń sózinshe, keıingi eki jylda eki aradaǵy taýar aınalymy ózgermegen.
- Búginde siz ataǵan kórsetkishti 7 mlrd dollarǵa deıin jetkizý týraly jospar daıyndaldy. Eki eldiń vıtse-premerleri jalpy quny 4,5 mlrd dollar bolatyn 34 jobaǵa qol qoıdy. Bul - naqty jobalar. Qazirdiń ózinde 300 mıllıon dollardyń kelisimsharty jasaldy. Taýar aınalymyn 10 mlrd dollarǵa deıin jetkizýdiń naqty is-qımyldardyń qosymsha jospary bar. Kórsetkish 2022 jylmen salystyrǵanda nege tómendep ketti degenge kelsek, negizgi sebep, árıne, baǵanyń qubylýynda. Taýar aınalymynyń qurylymyn qarasaq, Ózbekstanǵa eksporttaıtyn ónimniń kóbi shıkizat. Biz jetkizetin bıdaı, ken, kontsentrattardyń kólemi azaıǵan joq. Tek aqshalaı kólem azaıdy, - dedi Arman Shaqqalıev.
Aıta keteıik, búgin Májilis Qazaqstan men Ózbekstan Úkimetteriniń arasyndaǵy Ortalyq Azııa «halyqaralyq ónerkásiptik kooperatsııa ortalyǵynyń qyzmetin retteý týraly zańdy qabyldady.