Qazaqstan men Ózbekstan arasynda qatynaıtyn áýe reısteriniń sany artady
ASTANA. KAZINFORM — Ortalyq Azııa – Qytaı (S5+1) formatyndaǵy azamattyq avıatsııa salasyndaǵy yntymaqtastyq jónindegi Jumys tobynyń Konferentsııasy aıasynda Qazaqstan Respýblıkasy men Ózbekstan Respýblıkasynyń avıatsııalyq bılik organdary arasynda kelissózder júrgizildi. Bul týraly Kólik mınıstrligi málim etti.
Kelissózder barysynda Qazaqstan Respýblıkasy men Ózbekstan Respýblıkasy arasyndaǵy turaqty áýe reısteriniń sanyn arttyrý týraly kelisimge qol jetkizildi. Bul qadam kólik qoljetimdiligin damytýǵa, iskerlik jáne mádenı baılanystardy nyǵaıtýǵa, sondaı-aq eki eldiń týrıstik tartymdylyǵyn arttyrýǵa baǵyttalǵan.
– Qol jetkizilgen ýaǵdalastyqtarǵa sáıkes, eki eldiń belgilengen tasymaldaýshylaryna Almaty – Tashkent jáne Astana – Tashkent baǵyttarynyń árqaısysy boıynsha aptasyna 42 reıske deıin ushýǵa ruqsat berilgen. Basqa baǵyttarda aptasyna 14 reıske deıin ruqsat etiledi. Taraptar sondaı-aq elder arasyndaǵy turaqty reıster úshin belgilengen pýnktter sanyn kóbeıtýge kelisti, – delingen habarlamada.
Qazaqstan Respýblıkasy men Ózbekstan Respýblıkasy arasyndaǵy azamattyq avıatsııa salasyndaǵy yntymaqtastyqtyń damyp kele jatqanyn atap ótý mańyzdy. Osylaısha, 2025 jyldyń 3 shildesinen bastap Ózbekstannyń My Freighter (Centrum Air) áýe kompanııasy aptasyna 2 reıs jıiligimen Aqtaý-Nókis baǵyty boıynsha reısterdi oryndaı bastady.
Óz kezeginde, 2025 jyldyń 15 shildesinen bastap Fly Arystan aptasyna 3 reıs jıiligimen Atyraý – Tashkent baǵyty boıynsha áýe qatynasyn ashty.
Kelissózder qorytyndysy boıynsha taraptar konstrýktıvti dıalogty jalǵastyrýǵa jáne elder arasyndaǵy áýe qatynasyn odan ári damytýǵa jáne odan ári jemisti yntymaqtastyqty jalǵastyrýǵa baǵyttalǵan birlesken bastamalardy júzege asyrýǵa daıyn ekendikterin rastady.
Buǵan deıin bir jylda Qazaqstan men Qytaı áýe qatynasy 18 reıske kóbeıgenin jazǵan edik.