Qazaqstan men Ózbekstan arasynda qatynaıtyn alǵashqy týrıstik poıyz Tashkentke jetti
TAShKENT. KAZINFORM – 16 qarashada Almatydan jolǵa shyqqan Qazaqstan men Ózbekstan arasyndaǵy alǵashqy týrıstik poıyz búgin Tashkentke jetti, dep habarlaıdy Kazinform agenttiginiń menshikti tilshisi.
Alǵashqy týrıstik poıyzdy Ózbekstan astanasynda qarsy alý saltanaty ótti. Ol «Almaty – Túrkistan – Tashkent - Almaty» baǵytynda jolǵa shyqqan.
Atalǵan jobany uıymdastyrýǵa qazaqstandyq tarap bastamashy boldy. Tısinshe, oǵan elimizdiń týr kompanııalarymen baýyrlas memlekettiń týrızm komıteti seriktes qoldaý kórsetti.
Buǵan deıin poıyz jolaýshylary Túrkistanda saıahat jasap, Arystan-Bab, Qoja-Ahmet ıAssaýı kesenelerin aralaǵan jáne Otyrar qalashyǵy men Kerýen saraı keshenin tamashalaǵan.
Endi olar 2 kún boıy Ózbekstan astanasynyń kórikti jerlerin, ásem tabıǵaty men tarıhı oryndaryn aralap jatyr. Jolaýshylarǵa qaladaǵy qozǵalys úshin arnaıy týrıstik avtobýs berildi. Jalpy poıyzdaǵy saıahat 20 qarashaǵa deıin jalǵasady.
Aıta keteıik, «Almaty – Túrkistan – Tashkent - Almaty» baǵytyndaǵy reıstiń alǵashqysy pılottyq negizde oryndaldy. Aldaǵy ýaqytta ol aıyny 1-2 ret qatynap otyrýy múmkin.
«Osy joba arqyly aldaǵy ýaqytta elimiz boıynsha tolyq týrıstik baǵyttardy ashqymyz keledi. Máselen, Astanadan Alakólge, keıin Almatyǵa ári qaraı Túrkistannan Aqtaýǵa dál osyndaı týrıstik poıyzdardy shyǵarý josparymyz bar. Qazir zamanaýı vagondardyń sanyn kóbeıtemiz. Oǵan áleýetimiz jetedi. Eger týrıstik aǵyn artatyn bolsa, qosymsha poıyzdardy shyǵaramyz. Onyń ústine bizge 2025 jyly shveıtsarııalyq jańa vagondar kele bastaıdy. Munyń bári bizdiń múmkindigimizdi arttyrady», - dedi «Qazaqstan temir joly» UK» AQ Basqarma tóraǵasynyń orynbasary Ánýar Ahmetjanov.
«Jibek joly» poıyzynyń qyzmetin tek qazaqstandyq emes, sonymen birge sheteldik týrıster de paıdalana alady. Bılet qunyna úsh mezgil tamaqtaný, qalalardy aralaý jáne kásibı gıd qyzmeti kiredi.
«Ózbekstan men Qazaqstan týrısterge tarıhy tereńde jatqan «Jibek joly» baǵyty arqyly qyzyq dep oılaımyn. Bul ázirge pılottyq joba. Aldaǵy ýaqytta suranys artyp, poıyz ári qaraı Samarqan, Buqara, Hıýaǵa baratyn bolsa degen tilegimiz bar», - dedi jolaýshy Juldyz Raqmet.
Poıyz quramyna Qazaqstanda shyǵarylǵan, buryn-sońdy basqa baǵyttarda qoldanylmaǵan 5 jańa vagon qosyldy. Olardyń syrty memlekettik naqyshqa saı bezendirilse, ishki bóligi ulttyq oıý-órnekpen kómkerilgen.
Aıta keteıik, poıyz bıleti týr kompanııalar arqyly satylymǵa shyǵady. Jolaýshylardyń aıtýynsha onyń quny shamamen 150 myń teńge.
